Vawiin ni 3 June, 2025 (Thawhlehni) chawhnu dar 3 khan MZP General Headquarters Executive Emergency Meeting an thukhawm a. Health Department peng pakhat NHM hnuaia hna hrang hrang lakah, Advertisement leh dan tlawhchhan awm mumal loa hna lak a awm ngeiin a hria a. June ni 10, 2025 ral hma ngeia heng hna lakte hi cancel nghal turin sawrkar a ngen a ni.
MZP chuan tun hnaia Health Department hnuaia hnalakah, Advertisement pawh chhuah loa, duhsak zawngte lak an awm tih thuthang a hriat veleh theih ang angin a chhui nghal a. National Health Mission (NHM) hnuaia post 7; Lab. Technician- 3, Staff Nurse- 2, Asst. Data Manager-1 leh Executive Asst.- 1 te hi Advertisement tello a lak ngei an ni tih a hria a. DP&AR(ARW) OM- Guidelines for engagement of co-terminus (contract or provisional or otherwise) employees under Centrally Sponsored Scheme/Central Sector Scheme/Externally Aided Projects, etc, 2021 tlawhchhan miah loa lak a nih avangin, duhsak zawngte thunnaah a ngai tlat a ni.
NHM hnuaia dan dik taka hna lakte hi, an website-ah awlsam taka en leh hmuh theih a nih hlawm laiin, heng kan sawi tak hnate hi khawiah mah tarlan a ni ve lo a. A ruk a rala lak ngei tih a chiangah MZP chuan a ngai a ni.
MZP chuan thalai hna zawng mek kan in tlansiak mup mup laiin, hetiang sawi a awm leh thin chu a la thutak in a haw takzet a. Inelna thianghlim tak karah thalai a thiam leh tling apiang lak thin nise a duh a. Thalaite rilru tina tu leh, ti hnual thei zawnga hmalakna hi engti kawng pawhin a enliam dawn lo a, tuna Health Department-in NHM hnuaia hna pasarih lai Advertisement pawh chhuah loa an lo lak tawh hi cancel nghal a phut a ni.
MZP chuan Health Department a ngenna hi June ni 10, 2025 thleng a ngaichâng dawn a, chu chuan awmzia a neih loh chuan hmalak zel dan tur a ngaihtuah dawn a ni.
