Vawiin July ni 18, 2022 chhun dar 1:30 khan MPYCC chuan Treasurer Ngurdingpuia Pachuau hovin, Chief Minister Pu Zoramthanga hnenah Mizorama National Health Mission (NHM) hnuaia thawkte thilphut tihhlawhtlinsak tur leh Central YMA palainaa National Health Mission Employees Union Mizoram (NEUM) leh Sorkar inremna a taka a hlawhtlin ngei theih nan lehkha an thehlut. Lehkha thehluhah hian Pu H.P. Lalchuailova, General Secretary MPYCC chuan hming a ziak hnan a ni.
Lehkha thehluhah chuan, “Chief Minister i nihna mai piah lamah Finance Department changtu i nihna angin ; NHM thil phutte hi tihhlawhtlin sak tur leh nimin July ni 17, 2022-a NEUM leh Sorkar inkara Central YMA-in palai hna a thawhnaa NEUM te duh dan hrang hrang a hnuaia tarlan :-
1. Study group report chungchang
2. Hlawh lak chungchang
3. MESMA hlih chungchang
4. Show cause notice hlih chungchang,
Hengahte hian ‘hma an lak nghal tur’ thu Sorkar-in NEUM leh Sorkar inkara Palai hnathawktu Central YMA hnena a lo sawi hi a takin a thleng em tih hi kan lo enzui ve reng dawn a ni,” tiin Sorkar leh NEUM inremnaa Sorkar intiamna chu a hlawhtlin ngei theih nan Congress Thalai chuan an enzui zel tur thu an ziak tel.
“COVID-19 hripui avanga Mizoramin harsatna nasa tak kan tawha mahni nunna thapa ral hmatawng hna thawktu NHM hnuaia thawkte lungawi lohna avanga chawlh an lak avangin i sorkar pawhin Mizoram Essential Services Maintenance Act, 1990 (MESMA) a puan hnan an ni a, hemi hnu July ni 16, 2022 khan NHM hnuaia thawkte chu Mission Director NHM hming ziakin ‘Show cause notice’ pek an ni ta hial hlawm a ni,” tiin MPYCC lehkhaah hian ziah lan tel a ni bawk.
Congress Thalai hian a hmaa Chief Minister hnena Health Care chungchanga ‘Ultimatum’ an lo thehluh tawh leh Pi Lalhriatpuii (L) zangnadawmna chungchang tarlang telin, “Hei mai bakah hian June ni 20, 2022-a MPYCC-in i hnena July ni 20, 2022 hma ngeia Mizoram Health Care Society chungchanga point panga (5) kan tarlan mipui hmaa min puanzar sak leh tifel ngei tura kan phutna kha kan rawn hriatnawntir che a ni. Millenium Centre, Aizawla Grape Wine zuartu Pi Lalhriatpuii (L), Dawrpui Vengthar, Aizawl thihna chungchanga July ni 12, 2022-a Excise & Narcotics Dept. Minister Dr. K. Beichhua hnena zangnadawmna cheng nuai 100 pe tura phutna lehkha kan thehluh pawh sorkar hotu lu ber leh Finance Dept. changtu i nihna angin i hnenah kan rawn thlen nghal bawk a ni e,” an ti a ni.
