Ni 10 bawr velah sorkar hnathawkte hlawh pek hman beisei a ni : Lalruatkima, Adviser MNF

Aizawl August 3 : MNF Sub-Headquarters, Lunglei buatsaihin Saikuti Hall-ah vawiin khan Leadership cum Media Training neih a ni a. He hun hi khuallian niin Lalruatkima, Minister leh Adviser MNF ni bawk chuan hmanpuiin, “Ni 10 bawr velah sorkar hnathawkte hlawh pek hman beisei a ni,” a ti a.
Lalruatkima chuan, “Sum harsatna hi tun hnaia thleng chauh a ni lo a, Congress sorkar hmasa hun chhung zawnga kan hriat a ni a. Mi tam tak nunna suattu Congress sorkar zu zawrh pawh kha sum harsatna phuhrukna tura zu chhiah an it vanga zu zuar an ni,” a ti a. “Tun dinhmunah theih tawp chhuahin sorkar chuan tan a la mek zel a, mipuite tan thlaphanna tur a awm lo. Vawiin aia hun khirh leh harsa zawkah pawh min lo hruaikai tawhtu kan Pathian hian min hruai chhuak ngei ang tih kan ring a ni,” a ti bawk.
MNF Publicity Board Chairman chuan, “Sum harsatna thleng mek hi Mizoram chauh a ni lo a, India ram State hrang hrangte pawh an buai hlawm hle a ni. Ministry of Finance-in July 1 atangin CSS kalhmang ti danglamin PFMS kaltlanga release zel tur a ni a, CSS Implementing Department-te pawh Single Nodal Account (SNA)-ah sum dah zel tura tih an nih tak vang a ni. Keini state chauh buai fal bik kan ni lo tih hi mipui hriatah ka sawi duh a ni,” a ti a. “Tin, tun dinhmunah tak hian Department hrang hrang ten hmasawnna hnathawhna tur sum SNA-ah an kawl tam vanglai tak zawk a ni thei, tih kan hriat tel ka duh bawk a ni,” a ti bawk.
Lalruatkima chuan, “Congress sorkar hun lai Dt 31/5/2013 khan Vanglaini chanchinbuah
‘Treasury atangin hlawh chauh pe chhuak, Sorkar sum bawm khar a ngai lo ang- Liansailova Finance Minister’ tih kan hmu a ni.
“Kum thum chhung (2012-2015) Ways & means-in RBI-ah vawi 118 pawisa puk a ni, kum 2012-2013 atanga kum 2014-2015 (Nov 1, 2014) thleng khan RBI-ah nasa takin sum an puk a ni.
“Congress sorkar hun 2013-2014 RE thleng khan leiba cheng vaibelchhe 5455.95 zet kan nei hman a ni,” a ti a. “Vawiinah sum enkawl thu-ah thiam nei bik anga mipui hmaa an sawi mai hi a dik lo a, an hunlai kum 2015 Krismas bazar hun laia sum harsat zia leh van zia te kha kan la theihnghilh awm lo e,” a ti bawk.
Lalruatkima chuan, “Sum harsatna bul ber chu kan thawhchhuah tlem vang a ni, tih hi zep thu a awm lo a. Sorkar chuan thawh chhuah tam zawk kan neihna turin resource mobilisation chungchangah theih tawpin hma la mah se, a bik takin fiscal defecit control-na tura pawimawhte hripui leng vangin harsatna a awm a. A bik takin Khawlphetha leh Ration buhfai sum tam tak a kan lei, mipui phurrit anih venna tura subsidised a ni te pawh hi a hlawm lian zual a ni awm e,” a ti bawk.
Rural Development Minister chuan a department enkawl RD-in BADP Rs. Vbc. 12.56 chu June ni 14 2022-ah an dawn thu a sawi a. BADP sum lapse a awm ang a social media a tarlan chu thudik lo a nih thu a sawi. Tun hnaiah mirethei In sakna (PMAY Gramin) Rs. vbc. 41.916 zet beneficiary account-ah thun sak an nih thu a sawi bawk.