Vawiin khan Horticulture Department buatsaih Ni 3 chhung awh tur Horticulture Fair 2025, Aizawl Park a neih tur chu, RB McCabe Hall, Aijal Club- ah Horticulture Minister Pu C. Lalsawivunga’n a hawng.
C Lalsawivunga chuan, “Horticulture Fair hi kum 2012 atang khan kum tin neih a ni a, Covid19 hri leng harsatna avangin kum 2020 leh 2021 ah neih theih loh a ni a, Fair hi official – a ka tel vawikhatna a ni a, a hmuh nawmin a ropui ka ti hle a ni. Thlai chingtu te, a zuartu te leh a leitu te tan hun remchang tak buatsaih a ni thin hi a lawmawm tak zet a ni. Mizoram hian state kan nih atangin vawi tamtak budget kan lo pharh ve tawh a, kan state budget hi keimahni in a kan tharchhuah budget kan la nei ve lo a ni. Hma kan sawn hle tawh chung hian hei hian thar chhuah kan la neih tlem zia a ti langin ka hria a, department a thawk tute leh kuthnathawktute nen kan tang zel ang a, thlai thar chhuah tam lamah tan kan la chho dawn a ni.
“Department mi te pawh kuthnathawktute nen kan inpawh tlan a tha, dawhkan atanga kan ram thlai thar chhuah that dan tur buaipui ai chuan kuthnathawktute huanah kal chilh rawh u. An harsatna ngaihthlak sak u la, an huan lei lung te zir sakin an thlai chin hriselna te a hmunah en tam rawh u la, huan thlai siam tute tan belh tlak tak tak lo ni thar leh turin ka ngen che u a ni. Pangpar chungchangah pawh kum khat chhunga pangpar chingtu hrang hrangte lei chhuah zat Mizoram Florist Association atangin ka lo hria a, buaipui tlak, hna tak taka neih tlak a ni. Pangpar kan hralh chhuahna tam zawk pawh tualchhung a la ni rih a, ram pawnah tam leh zual thawnchhuah tham nei thei turin kan tang ho zel dawn a ni,” a ti.
Horticulture Minister chuan, “Mizo te hi hna kan thawk nasa em em a, thei leh thlai pawh thar tam mah i la, a hralhna lamah harsatna kan tawk leh thin. Hei hian thlai chingtu tamtak te rilru a ti hnuala, chumi tihzia awmna turin Assembly House ah pawh thei leh thlai thenkhat te siam dan danglam deuha tih ral dan kan pass a nih kha. Kuthnathawktuten taima takin lo thawk zel u la hei hian hmasawnna hmel thar min hmuh tir ka beisei a ni”, a ti bawk.
He hun hi Pi Ramdinliani IAS, Horticulture Department Secretary chuan a kai hruaia, Pu L.Lalhmingmawia Pachuau, Addl.Director chuan technical report pe in, ‘Horticulture Department in a hmun hma leh senso ngai zawng zawng a tum thu sawiin, Kuthnathawktute hlawkna tur leh thlai chin kawnga mi hlawhtling te chawimawina hun a tan Horticulture fair hi hman ?hin a nih thu a sawi a, chawhrualin kum tin cheng nuai 34 vel Fair ah hian kuthnathawktuten an lei chhuah ziah thu a sawi bawk. Pu C.H Lalmuanpuia Director Horticulture Department pawhin thu sawiin Selco Foundation te nen thawh hona thuthlung ziakin drone hmanga kuthnathawktute thlai tui pek leh hlo tura kahna buatsaih mek a nih thu a sawi bawk.
He hunah hian district 11 atangin Best Farmer Award mi 11 hnenah hlan anni a, Best Farmer te hi Selco Foundation te chuan Solar Spayer subsidy in an pe dawn a, Karnataka state ah a thlawn vekin an hruai bawk dawn a ni. Kumin Fair ah hian Best For Farming Horticulture District thlan thar a ni a, Saitual leh Champhai District ten lawmman pakhatna an la ve ve bawk a ni.
