Vawiin khan All India Congress Committee (AICC) hruaitute chuan Mizorama Rahul Gandhi lo kal tur chungchangah chanchinthar lakhawmtute kawmin, “Ram mipui te nen inlaichina tha zawk leh an harsatna leh buaina te ngaihthlak saka an hrilh hriat theih nan Rahul Gandhi chuan ramchhung hmun hrang hrang fang kualin hun a hmang mek a, he zinkawng hi Bharat Jodo Yatra tih a ni a. India chhim tawp Kanyakumari atanga India hmartawp Kashmir kea km 4,000 chuang kal in, mi chi hrang hrang, hna hrang hrang thawk te kawm in thlei bik a neilo va, an harsatna leh buaina te ngaihthlak sakin chinfel dan a ngaihtuah sak a, an tan aw niin a auchhuah sak thin a ni .Bharat Jodo Yatra in a tum ber chu mipui te aw hupbet a, ramchhung hmun hrang hranga harsatna an tawh mek, ram hruaitu ten hriat phak veloh te ngaihdan ngaihthlak saka, an tan aw pek a ni.
“BJP kaihruaina hnuaiah ram mipui tih thlabarin an awm mai bakah ram mipui te in karah inremlohna tur tam tak chawk chhuakin, sakhaw zalenna thleng a tih tawp sak mek a, heihi hrerengin Rahul Gandhi chuan mipui te ngaihdan leh an aw ngaipawimawh in mipuite aw a ni mek a ni. Rahul Gandhi hi midang anga Political Leader mahni tan chiah a hmasial ang ni ve lovin mipuite beiseina leh rinna ngah ngamna tur hruaitu a ni. BJP kaihruai state Manipur-a kan zo hnahthlak unau ten buaina an tawh ah pawh Prime Minister leh BJP hruaitu te chuan bengchhungawng in an ngaihsak loh zia leh an ngaihthah zia chu mitin hriat a ni a, Rahul Gandhi erawh chuan a hmun ngei ah tlawh in an harsatna leh hrehawmna tawh te hmuh puiin Parliament ah an atan au chhuahpui in an aw a ni.
“Rahul Gandhi hian thutharthehdarhtute a kawm naah ram chhunga buaina awm hranghrang amah ngeiin a hmuh pui leh a tawrhpui, sorkar in an aw a hupbet sakte tan thusawi sak thin in, an aiawh tu hruaitu a ni mek. Mipui ten an aw hre phatu hruaitu Rahul Gandhi anneih hnuah hian an harsatna leh an ngaihdan zah saklo tu BJP chu an thlauhthla mek zel a ni.
“Rahul Gandhi Bharat Jodo Yatra hlawhtlina hi ramchhung hmun hranghrang ah hmuh chhoh mek a ni a, state tam tak inthlan result ah Rahul Gandhi thawhrimna te leh mipui leh ram a hmangaihzia lang mek zel in, mipui ten ram a hmangaihna chu vote hmangin an chhang let ve zel a ni. Ladakh Autonomous Hill Development Council hlawhtlinna pawh Rahul Gandhi Bharat Jodo Yatra vang hi niin INC in seat 26 ah seat 22 an la a, Karnataka inthlanpui ah pawh Congress chuan Assembly Constiuency 20 ah seat 15 an la a ni. Bharat Jodo Yatra neihna state tamtakah Congress chuan hlawhtlinna hmu tawhin a hmu mek zel a ni,” an ti.
“Rahul Gandhi hian tun inthlanpui lo awm tur atan Mizoram in hma kan sawn ve theih nan Mizoram a rawn tlawh ve dawn a, Mizo mipui te ngaihdan leh ram hruaitu ten an hriatsak ve loh an aw te ngaihthlak sakin Mizo mipuite nen inlaichina tha zawk leh ram hmasawnna atana thawhona tha a awm theih nan alo kal ve dawn a ni. Rahul Gandhi ang ram hruaitu tha leh mipui te ngaihdan zah sak emem in Mizoram alo tlawh turah hian Mizo mipui te tan hun tha leh ram hruaitu tha Rahul Gandhi nen inpawhna hun tha tak a awm thei dawn a, Mizoram in hun rei tak tawh ata Jawaharlal Nehru atanga Rajiv Gandhi te thlenga inlaichinna tha lo nei tawh, ram min hmangaihpui tu anni,” an ti bawk.
Rahul Gandhi hian Mizoram a cham chhungin Aizawl leh Lunglei a tlawh dawn a, October ni 18 hian Press Conference a ko bawk dawn a ni.
