Ni 4 chhung awh International Tourism Mart 2022 chu nizan khan tluang taka zawh fel a ni.
ITM puala State Mega Exhibition, Aizawl Lammuala buatsaih chu nimin khan Governor, Dr. Hari Babu Kampadi-a’n a tlawh a. International Tourism Mart chu hun lo kal turah Mizoram-in khualzin a hip phahna a nih ngei a rin thu a sawi a. Mizo sumdawngte thil pholan zingah ramhmul damdawi leh puantah te chu chhinchhiahtlak a tih thu a sawi a. ITM chu Mizoram mai ni lo hmarchhak state dangte tan pawha inpholanna hun tha a nih thu a sawi bawk.
Tarlan tawh angin 10th International Tourism Mart hi sawrkar laipui Ministry of Tourism-in hmarchhak state-te’n khualzin hipna lama an theihna te an pholan theih nana a buatsaih thin a ni a, tun tum hi Mizoram-in a thlen vawi khatna a ni a. Ningani zan khan Aizawl Salem Mualpui Venga R. Dengthuama Hall-ah Union Minister of State for Tourism, Culture & DoNER, Kishan Reddy-a’n a hawng a ni.
