Vawiin chawhma khan, DIPR Govt. Mizoram leh Mizoram Film Forum (MFF) tangkawp huaihawt, ni nga chhung awh tur Acting Training ni khatna chu I&PR Auditorium, Aizawlah neih a ni a. He hun hi hawnna neih pahin, Lalsawmliana Pachuau, LPS Vision neitu, MFF Advisor leh Patron ni bawk chuan khuallian niin a hman pui a. Lemchan lama tui mi, mi 31 lai kal khawmte chu, Mizo Lemchan huanga mi hlun tak tak ten an tawiawm bawk a ni.
Hun hawnna a neih rual hian, khuallian chuan, Lemchan chu a zira zir ngei a pawimawh thu leh mahni a thiamna mai chuan tawp chin a neih thin zia te sawiin, Lemchan puitling nih phung leh Lemchang mite hriattur pawimawh tak takte inhrilhhriatna hun a hmang nghal bawk a ni.
He hun hi Aldrin Zosangliana, Chairman, MFF chuan kaihruaiin, Zothanpuia Sailo, Vice Chairman, MFF chuan hun serh a hmang a. KC Zoherliana, Secretary, MFF chuan, kal khawmte inhmelhriattirna neih pahin MFF hma lakna te report a pe nghal bawk a ni.
