Nikir ruahsur nasa avangin Mizoram hmun thenkhat ah harsatna thleng mek a, Tlawnglui pawh a tui chimchin a sang zel, hei bakah hian kumtin deuh thaw a lian thin, Lunglei district, Khawthlangtuipui pawh ruahsur avang hian lianin, tuipui kama huan eng emaw zat a chim tawh a, chanchin buatsaih lai thleng hian thu kimchang kan hre hman lo a, hetih lai hian Tlawng lui pawh lianin, Sairangah chuan lawng chawlhna pawh chim tawhin, tui chim chin hi a sang telh telh a, nimin lam khan Sairang Disaster Management Committee leh khawtlang hruaitute chuan Sairang balu kai leh a chhehvel a chengte hmun him lama insuanchhuak ngaite an buaipui a, tui chim chin hi a san chhoh zel chuan insawnchhuah ngaite chu a tul anga, an chhungte bula inthiar chhuak duh leh awmna remchang nei mailo tan YMA hall, Sabji Bazar leh Shelter Home te chu awmlailawk theihna turin an ruahman tih Sairang khawtlang hruaitute chuan an sawi a ni. Reiek Tlawng kai Aizawl tui lakna PHE Pump House bul pawh tuilian hian a chim sang sawt hle a, tun dinhmun ah chuan PHE hmunhma hi ala chim lo na in, ruahsur a nasat zel chuan a chim thleng tura ngaih a ni bawk.
Nikir Ruahsur nasa vang Serchhip District, Thenzawl khawchhung hmun hniam lai engemawzat chu tuilianin a chim a, Lunglei district-a Khawthlangtuipui lianin tuipui kama huan eng emaw zat a chim tawh bawk. Thenzawl Field Veng a Lalsanga Memorial Hostel chu tuilian hian chimin, Choka bungrua te a theih anga senghawi leh tui chim theih loh tura dah a ni a,Thenzawl Tualvungi Venga Vanlalzapi te In pawh tuilian hian chimin, khup chen vel In chhungah tui dai tur a awm a, an bungrua te tui chim theih loh tura senghawi niin, riah theih a nih loh avangin hmundangah an riak chhuak a ni.
Thenzawl-a ruahsur nasa hian Aizawl Thenzawl Lunglei World Bank kawngpui, Lunglei lam, AH&Vety Farm Complex, Vety Dilpui luhna bul kawngpui chu lirthei tana zawh fimkhur ngai takin Tuilian hian a chim a, tui a len tam lai phei chuan, tuilian hi a khauh ang reng a, lirthei vei vak tan pawh fimkhur lehzual a tul thu an sawi. Champhai District a Tuichang lui pawh a lian tawh hle a, chanchin buatsaih lai hian Lui kam zawl chu tuiin a chim pil vek tawh niin thu kan dawng bawk.
Hetih mek lai hian Mizoram hmun hrang hranga kawngpui sial leh siam hnathawk mek National Highway Infrastructure Development Construction Ltd. NHIDCL hnathawh tha tawklo chu ruahsur nasa avang hian a lang tan mek nia thudawn niin, an thilsiam retaining wall leh culvert an siam te chu a siamdan phung athat tawk loh avangin chhia leh chim hmuhtur a awm chho mek a, Inrinni zing dar 4:30 vel khan Tuikhurhlu vengchhaka Lalthuamliana in Assam type chhawng hnih (floor 3) chu a bula retaining wall chimin a pawt chim a, thi an awm lo hlauh a ni.
NHIDCL te retaining wall siam hi a foundation laih mumal a awm lo niin khawtlang hruaitute chuan an sawi a. Vawi tam tak hnathawktute hnenah an complaint thin a, awmzia a awm lo niin thudawnna chuan a sawi. Hnathawktute hi hnamdang an nih thin avangin hnathawk vil tur leh tawng let turin Mizo an ruai thin a, awmzia a awm lo niin an sawi a, Mizo thawk ve pakhat hnena an thlen chuan “Engineer ten a tha tawk an tih chu a tha a ni mai. Nang nin a thalo in lo tih khan awmzia a awm lo” tiin a chhang niin thudawnna chuan min hrilh.
Lalthuamliana te in hi kawngpui thlang lam kawng ana ding a ni a. A chung ber kawngpui an chu an huan hnathawk (labour) ten riah nan an hmang a, in chim hma hian an tlanchhuak hman vek a ni. Kawng an hnuai chiah, a chhawng laita chu Darthantluanga te chhungkuain an luah a, an ni pawh in chim hma hian an tlanchhuak hman bawk. Retaining wall chim hian ina riak mi pathumte a chimpuia, a tirah an chin hriat a ni mai lova, a hnu lawkah kawngpuiah an rawn vak chhuak ta a ni. An pathum hian lang theihah hliam nasa an nei lova, an kawng na an ti hlawm. Aizawl Civil Hospital rawn panpui an ni.
