Nimin khan Aizawl District Congress Committee (ADCC) chuan Aizawl khaw-pui chhung hmun hrang hrangah hlemhletna (corruption) a inhnamhnawiha puhna atanga Court in Chief Minister Zoramthanga thiam a chantirna chungchangah mipui rilru a a hneh lohzia lantirna poster tar hnatlang an nei

Vanapa Hall kawtah inkhawm tawi neiin, he hunah hian ADCC President Lalzuiliana’n thusawina a nei. ADCC President Lalzuiliana chuan, “Kan ram hotupa ber hian Aii Puk rama a huan hungna atan sorkar sensoin kelpal (Goat proof Wire-mesh) leh Angle Iron Post a inpek tir ngei niin a lang a. Heng bakah hian a sum lakluh aia a
hausak vanga a unaute pawisa kawl sak anga an insawi te hi tun hmaa kan hriat ngai loh a ni a, mipui tan awih chi a ni lova. Hetianga phuahchawp taka
thiam inchantirna hi Pu Rokunga hlain, ‘Dikna a fam ta, felna a tlawm ta’ a tih ang mai a ni a, a lungchhiat thlak a, Mizoram mipuiin engtikah mah kan pawmpui loh tur thutlukna kan hmu a ni’, a ti. Ni 8.11.2021 chawhma khan Special Court (Prevention of Corruption Act) chuan Chief Minister thubuai pahnihah thutlukna a puang a; pakhatah thiam chantirin, pakhatah a chhuah zalen thung a ni. Court thutlukna puangtu hi Special Judge (PC Act) Vanlalenmawia a ni. ADCC poster tar thupui thenkhat te hi Dikna a fam ta, Eiru tan lungin aiah chawimawina, eiru zalenna ni, kan eiru ve mai dawn nge, eiruk kan do dawn, ti te an kenga, heng poster an
kente hi khawpui chhung hmun hrang hrangah tar leh a ni.