Nimin September ni 21, khan Mizoram ah COVID-19 positive thar 1355 hmuhchhuah a ni.

ZMC RT-PCR Laboratory a sample test 1122 zingah Covid-19 positive 324 hmuhchhuah a ni a. TrueNAT Laboratory a sample test 288 zingah positive hmuhchhuah 56 a awm a. RAgT hmanga sample test 7189 zingah positive 945hmuhchhuah a ni a. FIA (Fluorescent Immunoassay) hmanga sample test 206 zingah positive hmuhchhuah 30 a awm bawk. Nimin zing dar 5:55 khan Pu Samsul kum 75, Ramhlun Venglai chu Covid-19 vangin ZMC ah a boral a. Aug. ni 29 khan hri a kai tih hriatchhuah niin hemi ni hian admit nghal a ni a, natna dang nei, enkawl lai a ni. Nimin zing dar 7:30 khan Holencha kum 25, Mualthuam chu Covid-19 vangin a boral a. Sept. ni 16 khan hri a kai tih hriatchhuah niin, in lamah an inenkawl a, nimin zing khan Kawrtethawveng PHC panpui a nih laiin kawng lakah a boral ta a ni.
Nimin zing dar 9:50 khan Pu Sangluaia kum 94, Zemabawk chu Covid-19 vangin ZMC ah a boral a. Sept. ni 12 khan hri a kai tih hriatchhuah a ni a, Sept. ni 20 khan admit a ni. Nimin chawhnu dar 1 khan Pu Zokhuma kum 82, Muanna Veng, Aizawl chu ZMC ah Covid-19 vangin a boral a. Sept. ni 5 khan hri a kai tih hriatchhuah niin, hemi ni vek hian admit nghal a ni a; natna dang nei, inenkawl lai a ni. Nimin tlai dar 3:25 khan Pu Bobby Lalthanpuia kum 43, Lunglei Bazar Veng chu Covid-19 vangin a boral a. Nimin khan Civil; Hospital Lunglei ah inentir tura kalpui niin, Covid-19 hri a kai tih hriatchhuah a ni a, a boral zui nghal a ni.
Heti hian Covid-19 vanga Mizoram a nunna chan chu 268 an tling ta a ni.