Lalnunmawia Chuaungo, Sr. Vice President MPCC chuan, “Tunlaiin Mizoramin sum kan harsa em em a. Sorkar pawhin tihngaihna tak hre lovin puk tur zawn chu a hna ber a ni mai a. Hetih laiin ZPM sorkar chuan kan ti ve lovang an tih zawng zawng ti vekin, Mipui sum an chawma an hawp bawk laiin mipui thleng phak sum lengvak a tlem em em a. Hei hian rukruk, tualthah, in rawk, ruangchhar, ruihhlo tawlh a ti hluar a. Mahni taksa ngei Social Media-ah langsar taka zawrh nasa takin a ti hluar mek a ni. He’ng hi mipui hnen thleng phak lo sorkar kan hrawnin a rah chhuah a ni a. Tunlaia Mizoram chhunga thil thleng chu chanchinthar ngaihthlak leh chhiar peihawm loh khawpin a tha lo hle a ni,” a ti.
Lalnunmawia Chuaungo chuan, NLUP atanga Tung chingtu hlawhtling Pu Rualzakhuma hmalakna a hmunah tlawhin NLUP in Mizoram chhungkaw tam tak dinhmun a khai chhuah nasatzia chu khawtinah zêp theih loh khawpin a lang tih sawiin, Pu Rualzakhuma’n Tung Oil bakah a herna fê (cake) leh a hnah leitha atana siama hralh chhuah tham an neih bakah chhungkaw tam takin an zara eizawnna an neih bawk avangin NLUP hi Mizoram tan malsawmna a ni tih sawiin, Congress Party Pathian leh mipuite zara a sorkar leh hunah mi hniam leh harsa zawkte thleng phak NLUP changtlung zawk kalpui a ni ang a, tuna Mizoramin harsatna leh buaina a tawhte hi thawnthu-ah kan chantir dawn a ni. Chutiang tur chuan kan inpeih tawh a, mipui pawhin min auva, an lo haw khawm mek a ni, a ti.
MPCC Senior Vice President Lalnunmawia Chuaungo hi Lalrindika Ralte, GS MPCC, MS Dawngliana (Madawnga), Secretary MPCC, R. Lalhmingmawia, GS MPYCC, Robert Zotinkhuma, Secretary MPYCC ten an tawiawm a ni.
