Vawiin May 9, 2025 (Zirtawpni) hian MPCC chuan Congress Bhavan Golden Hall-ah Political Session an hmang a, he huna thusawitu Pu TT Zothansanga chuan, “Congress sawrkar laia hlawhtling taka kan kalpui NLUP kha mi thenkhatin ‘Sem Policy’ tiin min sawisel sak thin. NLUP kha ‘Sem Policy’ a ni ngawt lova, mipuite eizawnna bul tan sakna, an hmalakna atana lung rem sak ang a ni a, oposition te hian an huphurh vanga maia sawisel thin an ni.
“Tun sawrkar pawh hi sem policy sawisel thin tu an ni a, mahse ‘Banakaih Policy’ hmangin sem an tum ve leh tho a ni. NLUP kha a hlawhtling vek lo ang, mahse mi tamtakin an hlawhtlinpui a, NLUP sem lai te khan sumdawng thlengin an hlawkpui vangin nuam an ti a, mi tamtakin a zar kan zo a ni.
“MNF in SEDP kan sem ang an ti a, mahse an sem mumal thei lo. ZPM in sawhthing kan lei ang an ti a, mahse thingtlang kuthnathawktute ti beidawng tawk chiahin an che a, an khawngaihthlak hle a, an thawhrim rah pawh seng thei lovin an awm mek a ni. Mi tamtak titi ah chuan Congress nge nge kha an tha ber an ti leh tawh a ni. Congress chuan NLUP tha takin kan kalpui thei a, chhungkaw 147360 vel in an dawng a, hlawhtlinpui tamtak an awm.
“Tuna sawrkar mek hian an sawrkar hma khan kuthnathawktute hmakhua an ngai hle thin a, anmahni avanga dingchhuak an ni. Mahse an han sawrkar ta cheng a, kuthnathawktute tan Budget ah sum hmuh tur a awm lova, D-A-H an sawi thin kha hmuh tur a awm lo.
“Kan CM hian hmani lawk khan Treasury Officer ho hma ah ‘Sawrkar kum hlui atangin kum tharah vaibelchhe 900 chuang kan chhuahpui a ti a, mahse vaibelchhe 500 vel an ba zawk niin kan hria. ZPM sawrkar hian pawisa hi vawi 52 lai na puk tawh a, an sum puk pawh cheng vaibelchhe 2410.26 lai a tling tawh a ni. Sum enkawl thiam inti an ni a, mahse an puk tawk tawk mai a ni.
“Tun Assembly Session ah khan thil pawi tak pahnih a awm a, Village Council Bill leh Mizoram Youth Commission an siam thar kha a ni. Dan awmsa ami entawn in a thar an siam a, an kutchhuak angin an chhuah a, a pawi hle. Kum 1953 a dan siam kha kum 2025 thleng kan hmang emaw thangthar ten an ngai ang tih a hlauhawm a, Congress leh MNF te pawn kan siamtha fo a, a hlui tho entawn in a thar an siam ani tih mipui pawhin lo hria se a tha.” a ti.
Friday Political Session ah hian India sipai ten ram hmelma an beihna kawngah Congress ten kan thlawpzia lantirna kan nei a. He hun hi Pu Lalbiakzama, MPS (Retd) General Secretary in kaihruaiin ram tana an thawhna leh inpeknash Indian Armed Forces te kan chhuang takzet a ni.
