Pachhunga University College (PUC) National Service Scheme (NSS) unit chuan vawiin chhun khan PUC Seminar Hall-ah an kum 50-na, golden jubilee an lawm a, Rajya Sabha MP K Vanlalvena’n a hmanpui a, Jubilee hriatrengna lungphun a hawng.
MP K Vanlalvena chuan, amah pawh PUC-a lehkha zir thin a nih thu sawiin, PUC chu Mizorama college ding hmasa ber leh NSS din hmasakna ber a nih thu sawiin, NSS hmalakna avangin PUC campus-in ram ngaw tha tak a neih thu a sawi a; “PUC campus a hrin dup theihna atan hian NSS-te’n hma an la nasa a, tunah chuan Aizawl tinuamtu a ni tawh,” a ti.
Khualzahawm Dr Zirlianngura, state NSS officer pawhin thu sawiin, PUC NSS golden jubilee lawmpuina a hlân a, “Mizoramah chuan PUC-ah NSS bul \an a ni a, engkimah PUC hi bul tantu a ni zel a, hun lo la kal leh zel turah pawh hmahruaitu leh bul \antu in nih zel ka beisei,” a ti a; Mizorama NSS programme officer pasarih leh NSS volunteer pakhatin NSS national award an dawn tawh thu a sawi.
PUC NSS golden jubilee lawmna inkhawm hi NSS programme officer (PO) Dr K Vanlaldinpuia’n a kaihruai a, NSS PO zinga national award dawng tawh pahnih – Dr Lalthankungi leh Dr Zoramdinthara te pawhin thu an sawi. MLA Dr Vanlalthlana, Association for Voluntary Blood Donation leh Mizoram Journalists’ Association hruaitute pawhin an hmanpui a ni.
NSS golden jubilee lawmna pual hian PUC NSS chuan essay, poetry leh lemziaka intihsiak an buatsaih a, vawiina jubilee lawmnaah hian intihsiaka ti thate hnenah lawmman an sem bawk.
