Oil Palm chingtuten kawngchhia an tuar nasa

Tuidam Zau a kuthnathawktu te chuan kawng chhia avanga an thlai thar phurhchhuah kawngah harsatna an tawh avangin July thla chhung khan cheng nuai 10 vel an hloh tih an sawi.
Tuidam khua hi Mamit district a awm niin, Kuthnathawktu chhungkaw engemawzatin Oilpalm huan siamin eizawnna an kalpui a, heng mi te hian Oilpalm chu an eizawnna berah an hmang a ni. Fur ruahtui tla avangin an Oilpalm phurhchhuahna kawng chhia chu an theih ang angin hnatlanga siamin Oilpalm te an phurchhuak thin a, hetihlai hian Leimin leh Kawrtuiin kawng a tihchhiat nasat avangin July thla atang khan Tractor takngial pawh a kal theih loh avangin vawiin thlengin an Oilpalm te an phurchhuak thei lo tih an sawi a, kawngchhia avanga Oilpalm an hralh theih loh hi cheng Nuai 10 man vel a tling tawh tih Tuidam Zau hruaitu te chuan an sawi.
Tuidam Oilpalm zau hruaitute chuan, Oilpalm an chin dawnin sorkarin Zau anga hma an lak chuan an zau panna kawng pawh tha zawka siam a remchan tur thu an hrilh nia sawiin, kum 10 chuang a liam hnuah pawh kawng tha an la nei lo chu sorkarin a tih tur a ti lo a ni tiin, tun dinhmuna an harsatna chu hrethiama an kuthnathawh rah an seng theihna turin, an kawng chu Tractor tal a kal theih nan sorkarin hma lakpui thuai se an duh tih an sawi a ni.