Governor Hari Kambhampati chuan vawiin khan Raj Bhavan-ah Agriculture Department hotute leh an thawhpui company – Godrej Agrovet Ltd leh Patanjali Foods Limited official te a kawm a. He hunah hian hriak atana sawr chi thlai chi te, be chi hrang hrang(pulses) leh Oil Palm tharchhuah kawnga Mizoram dinhmun te PowerPoint hmanga thlir ho a ni a. Hemi hnu hian he hmalakna huanga tanlak chhunzawm dan tur leh harsatna thenkhat chinfel dan tur te sawiho a ni bawk.
Oil Palm hi Mizoramah kum 2005-06 atang khan The Mizoram Oil Palm (Regulation of Production & Processing)Act. 2004 peihfel a nih hnuah chin tan a ni a. A tira chhut dan chuan Mizoramah Oil Palm chin theihna hmun 66,791 ha. (3.16% of geographical area) a awm niin chhut a ni a. Hmalakna kalpui tak tak a nih hnuah Oil Palm hi 26,730 h.a a zauah chin a ni. Chhan hrang hrang avangin Oil Palm ching an tlem ta deuh a, tun hnaiah khan zirchianna neih a nih hnuin 3398 h.a. a zauah chiah Oil Palm hi chin mek a ni. Tunah hian Oil Palm hi District 7 ah chin mek a ni a, khaw 193 ah kuthnathawktu chhungkua 2733 ten Oil Palm huan an enkawl mek a ni.
Oil Palm rah hralhna rate hi International Market milin tih danglam a ni thin a. Formula Price of NMEO-OP chu November 2022 khan hman tan niin he me mila oil palm rah(FFB) hralhna rate chu tunhnaiah – November 2022 Rs. 10.63 per Kg., December 2022 Rs. 10.817 per Kg.,January 2023: Rs. 10.38 per Kg., leh February 2023: Rs. 10.28 per Kg ah te fixed a ni mek a ni.
Tunah hian Oil Palm sawrna hmun hi Bukvannei, Kolasib Districk ah Godrej Agrovet Ltd in a enkawl mek a. Kum 2014 atang khan chawl lovin Oil Palm hi an la her reng a ni. Vawiin khan Patanjali Foods Ltd aiawhtu chuan naktukah Lawngtlai District-ah Oil Palm herna tur bun turin inremna thuthlung ziah a ni dawn tih a sawi a. Ruahmanna awmsa ang chuan he Oil Palm herna hi Liapha hmun, Rualkual Khua, Lawngtlai District-ah bun a ni dawn a ni.
