Oil Palm hralhna a ziaawm chho

Aizawl 30 May 2022: Mizoram a Oil Palm rah hralhna rate tharah Oil Palm chingtu kuthnathawktu ten an sum lakluh a let deuhthawin a pung tih an sawi
Thudawn danin Mizoram a Oil Palm chingtu ten hun rei tak Oil Palm rah (Fres Fruit Bearing) an hralhna rate hniam taka a kal laiin, tunhnai khan Oil Palm Price fixation committee in, Oil Palm leikhawmtu Godrej Company ten an leina rate Kg – 1 cheng Rs 10/- ni turin a ruahman ta a, tun dinhmunah Mizoram a Oil Palm chinna hmunpui Kolasib leh Mamit district-a Oil Palm hralhna rate chu Kg1 Rs 10 ani mek a ni.
Hei vang hian Oil Palm chingtu te chuan sorkar hmalakna ah lawmthu sawiin, hetianga Oil Palm hralhna rate lo sang ta hian an sum lakluh a let deuh thawin a tipung ta tih an sawi a, nitin mamawh hriak ei chi tharchhuaktu an nih avangin Oil Palm huan siamah an phur thar hle tih kuthnathawk tu (Farmer) te chuan sawiin, mi thenkhat chuan an Oilpalm huan te zauh belh tumin hma an la mek bawk.
Bungthuam leh Zawlpui khua a Oil Palm huan siamtu kuthnathawktu te chuan, Hriak eichi a India ram kan intodelhna turin Central sorkarin beihpui a thlakna NMEOOP scheme chu nikum Sept thla a hawn a ni tawh a, he scheme kalpui ve tur hian Mizoram sawrrkar pawhin agreement an ti fel vek tawh tih sawrkar hotu te hnen atanga an hriat thu sawiin, amaherawh chu tun thlenga Agriculture dept in he scheme a la kalpui ve lo chu, a rang lama NMEOOP scheme hman a nih theih nan chak taka hma la tura an duh thu an sawi a ni.He scheme ah hian Oil Palm rah (ffb) man chu market rate a innghat a nih tur thu leh a tlem berah pawh Kg -1 cheng Rs 20/- vel beisei a nih thu te, tunah pawh state dangah chuan Oil Palm rah hi Kg 1 cheng Rs 22/- a nih mek thu te an sawi bawk.