Vawiin October 13, 2023 (Zirtawpni) hian Congress Party chuan Congress Bhawan, Golden Hall-ah Friday Political Session an hmang a. He hunah hian Lal Thanzara, Sr. Vice President MPCC chuan thu a sawi a ni.
He huna thusawitu Lal Thanzara chuan Congress Party hi India ramah sakhaw zalenna kengkawhtu kan nih angin Kohhran hian Congress Party anga min thlawp a rem lo anih pawhin Missionary te’n zalen taka Pathian rawng an bawl leh theih nan sakhaw zalenna duhtu hi min thlawp turin ka sawm a ni, a ti.
Mizoram leh India ram tana BJP leh a thawhpuite dân siam tha lo tak tak chhu chat a, sût a nih leh ngei theihna atan Congress Party chuan hma a la zel dawn a. Ram mipui himna leh Kristian te’n zalen taka India rama Pathian rawng kan bawl leh theih hi kan duhthusam a ni, a ti bawk.
Mizorama sorkarna siamtu Regional Party chuan loh theih lohin BJP an thlawp a ngai a. Mipui bum nan BJP kan thawhpui lo ti thin mah se NEDA hmanga an thawhho thu leh MNF President ngei pawh BJP ho kara a thlalak kan hmu fo a nih hi, a ti a.
Lal Thanzara chuan ZPM chungchang sawi chhunzawmin enchhin an nih tawh thu a sawi a. A hming thar avanga tha thut thei an ni lo, a ti bawk. ZPM Leader phone call pûtru (leak out) pawh kan ngaithla vek a. Sorkarna siam ta se Mizoram chhiat vek pawi ti lovin BJP an thawhpui ngei tur thute kan hria a nih kha. Kan ram thenawm State-te atangin BJP that lohzia chu kan hriat tawh hi, Mizo Kristian-te tan an hlauhawm em em a ni, a ti.
Congress Party chuan kan ti ang kan tih chu kan ti ngei thin a. Enchhin kan lo nih tawhnaah kan thutiama ding tlat thin kan nih avangin Mizoram mipuiten Congress Party hi min enchhin leh mai rawh u. “Tang Puihna” hmangin tang tak takte kan chawi kang dawn a. Kan ti ang kan tih chu kan ti leh ngei dawn a, enchhin leh mai tlak turin Pathian chakna ringin kan insiam tha tawh a ni, a ti bawk.
Pu Lal Thanzara chuan MNF sorkarin a thil tha tihte hi Congress Party kan sorkar anih chuan a theih chinah kan chhunzawm zel ang a. School 180 chuang changtlung lo taka tihhmasawn (Up-Grade) a ni hi a lawmawm hle a. Chutih rualin a hautakzia leh a harsatzia hre chunga kalpui chhunzawm zel kan tum a, Congress Party kan sorkar a nih phawt chuan tun aia changtlung zawk leh tha zawka kalpui kan tum a ni, a ti bawk.
He hun hi F. Lalhmangaiha, Secretary MPCC chuan a kaihruai a. David Zochhuanmawia, Media Deptt. MPCC hnen atangin Report ngaihthlak a ni bawk.
