Opposition party-te an chiri hle : Lalruatkima, MNF Adviser

Sairang Zero Point -ah vawiin khan MNF Diamond Jubilee lungphun, Aizawl West I MNF Block buatsaih chu Lalruatkima, adviser chuan a hawng. Hemi hnu hian Aizawl West I MNF Block Political training, Holiday Palace-ah neih a ni a. He hun hi Lalruatkima Minister, MNF adviser ni bawk chuan khuallian niin a hman pui a; Zothantluanga bialtu MLA chu khualzahawm a ni.
He hunah hian party hrang hrang atangin voter 495 MNF-ah lawmluh an ni.
Lalruatkima chuan thusawiin, “Kum 2022 inthlan puiah Pathian leh mipui zarah MNF kan sorkar leh ngei ka ring a. Pu Zoramthanga Chief Minister, ram vei mi, vision nei tha, a taka thawk thin kan nei a. Mumal taka MNF kan kal laiin Opposition party-te an chiri hle. Congress party-te India ram hmun ril lamah awmzia an awm tawh lo a, Mizoramah lah nise hmanni maia mipuite hnawl hnu kha an ni. Congress hi mipuiten tute nge an nih kan hria a, sorkar turin mipui rin an la hlawh lo tih a chiang. ZPM lah nise, an party kalphung pawh a mumal lo hle a. An president Pu Lalliansawta’n ‘kan sorkar chuan Pu Lalduhoma a CM ang’ a tia. Amah Pu Duhoma ve thung chuan, ‘kan sorkar chuan CM tur chu Val Upa Council-in a rel ang’ a ti lawi a. An thu leh an chhezia leh ui bengah hlin tur a awm lo a ni,” a ti.
Lalruatkima chuan, “Congress sorkar laiin Zu zawrh avangin Zoram mipui kan rum thin a, tunah chuan a lo reh ta a. Tlaivara gas chan a bo a, hnianghnar takin gas kan nei ta a. Kawng hrang hranga mipuite nitin mamawh kan lo hnianghnar ta viau a ni. Eiruk do nan Lok Ayukta kan din ang, kan ti a, kan din a. Zirtirtu ringawt pawh 3000 chuang kan la tawh a ni. MNF hian ?halai lehkha thian tan sorkar hna a siam hnem ta hle. Lifetime vehicle tax mipui tana phurrit pawh zangkhai zawkin mipui tan siam rem a ni ta bawk a ni,” a ti.
Lalruatkima chuan, “Zoramin hun harsa leh manganna kan tawk a; lungthu pathum – sorkar, kohhran leh tlawmngai pawl kan ?angrual a, tumah chhuanchham kan awm lo. A lawmawm tak zet a ni. Pathianin he ram tana malsawmna min pek MNF sorkarah hian kan hmu tam hle a ni,” a ti a. “Term lehah hian MNF a sorkar leh ngei ka ring a, MNF sorkar kaltlangin Pathianin Zoram hi nasa zawkin malsawmna min vur ka ring tlat a ni,” a ti bawk.
Khualzahawm Zothantluanga bialtu MLA pawhin thusawiin, “Zoramin hripui avangin hun harsa tak a tawk a, chu hun harsaa Pathian leh kan Chief Minister Pu Zoramthanga min hruaina a ropui tak zet a ni,” a ti.