Vawiin January ni 31, 2023 (Thawhlehni) hian Aizawl South III North Block MNF huaihawtin Falkawn Community Hall-ah Political Training neih a ni a. He hun hi Aizawl South III bialtu MLA, MNF Gen.Hqrs Adviser ni bawk Prof. F.Lalnunmawia’n a hmanpui.
Aizawl South III Bialtu MLA chuan, “Aizawl South III bialah mi thahnem takin MNF an zawm thar hi lawmawm ka ti a, kan khingpuite sawisel leh beihna karah kan pung zel hi a lawmawm takzet a ni. Kan thupui ber pakhat ‘sem sem dam dam’ tih hi kan kalphung ni zel rawh se” tiin party workers kal khawmte a chah a ni.
MNF Adviser chuan, “Opposition-ten kan party leh kan sorkar hotute karah hem thlak tumin an thiam chitinin an bei a, mahse chungte chu a tak a nih loh zia a lang zel a ni. Tunah hian kan hotute leh kan sorkar hi kawng dangin min bei leh ta a, kum hnih kal ta maia Covid-19 hrileng leh thil dang vanga sum harsatna kan tawh nasat ziate kha sawi tha duh si lovin, kan sorkar leh kan CM hi sum enkawl thiam lo leh hmasawnna hna thawk chaklo hrim hrim ang tein min sawisel mek a ni, a ti bawk.
Kum 2020 leh 2021-a kan hun tawn kan thlir let chuan kum hnih zet Covid-19 hrileng vanga kan manganzia te, hrileng do nana sorkarin theihtawp a chhuah zia te, Central sorkar atanga Mizoramin sum kan beisei zat kan hmuh loh ziate kha tlang hriat a ni, opposition unaute hian khang kan hun tawn harsat zia leh manganthlak ziate kha an theihnghilh ta mai em ni tih hi ka zawhna a ni,” a ti.
“Harsatna hrang hrang karah sorkar laipui 15th Finance Commission rawtna atanga kan sum hmuh zat a tlem nen, chu mai bakah sorkar laipui thu angin CSS Fund Crore 600 chuang sorkar sum bawm atanga release a ngai bawk nen, heng harsatna hrang hrang karah hian tu pawh sorkar se tun ang baka sum enkawl thiam ngaihna a awm chuang lo ang. Chuvangin he kan sorkar, hun harsa leh khirh tak paltlang hi sorkar term dang nena khaikhin chi a ni lo. Pathian hruainain kan sorkar hian theihtawp a chhuah a, hun harsa leh khirh takte kan paltlang thei hi a lawmawm em em zawk a ni,” a ti bawk.
Prof.F.Lalnunmawia, MLA chuan, “Kumin 2023 hian kan sorkar sum dinhmun te a ziaawm chhoh kan beisei a, Pathianin rem a tih chuan nasa taka hna thawh kan tum a, bial hrang hrangah hmasawnna a thlen a beiseiawm a ni. Hemi bakah kan Flagship programme SEDP pawh tihhlawhtlin chhoh zel kan tum a, he SEDP hian kuthnathawktute leh mirethei zawkte fairelbel a thleng ngei dawn a, beneficiary pawh kan thlan belh leh tep tawh, kan target pawh cheng nuai thum aia tlem lo a la ni reng a, installment-a pek chhoh zel kan tum a ni,” a ti.
