PAMRA chuan thuchhuah siamin, “Manipur State-a kan Mizo Hnahthlak awm te, an awmna hmun hma chhuhluihsak tumna leh an dikna chanvo rahbeh leh chimral tumna avanga, State Chief Minister N.Biren Singh hote leh Meitei Hnam ten tharum thawhna hleihluak tak an thlentir hi PAMRA General Headquarters chuan ṭhalo kan tiin, kan dem takzet a ni.
“Keini Peace Accord MNF Returnees’ Association (PAMRA) te hi kan Ram leh Hnam tan a nunna hial pawh hlan ngamtu, kan Hnam Pasalṭha Martarte zah tak tu leh thinlung a la vawng nung tlat rengtute kan nih avangin, kan Hnampui Manipur State chhunga awmte tawrhna hi thinlung takin kan tawrhpui hle a, chutihrualin, chimral tumna leh neksawr tumna avanga an mahni sahim nan te,Ram leh Hnam chhan nan te leh an dikna chanvo humhim nana an hmalaknate hi kan chhuangin kan thlawp tlat a ni.
“Manipur Sorkar leh Meitei Hnam te hian kan Mizo Hnampui unaute chungah tharum thawha, Kristian Biak In tamtak halsak a, Nunau leh pawisawilo te thlenga nunna an laksak hi a pawi kanti takzeta, dawihzepthlak kan ti. Thil ṭha lo a thlen zui zel loh nan Central Sorkar, Ministry of Home Affairs hian Manipur tualchhung buaina hi chingfel vat turin kan phut a ni.
“Mizo Hnahthlak chhak leh Thlang, Chhim leh Hmar ami zawng zawngte u Peace Accord MNF Returnees’ Association (PAMRA) chu kan Ram leh Hnam tan kan dinna ngai rengah kan la ding reng e. Mizo Hnam Him reng rawh se,” tiin an tarlang.
