Vawiin ni 18.9.2023 khan Mizo Hnam Run inkhawm neih a ni a, thusawitu MNF Adviser leh Minister Robert Romawia Royte chuan political party leader ni tur chuan mi ze nghet, zuanglawr mai mai lo mipuiin kan duh. Tuna ZPM leader ang chi political party 9-a zuang lawra fail vek tawh hi a party 10-naah pawh a fail leh mek a, Super CM tura enchhin chi a ni lo, a ti.
Robert Romawia chuan: “ZPM MLA Candidate list en ila CM atan Pu Duhoma test duh tur chu tlemte an ni. ZPM chu an hotu lian tam takin an tlanchhiatsan mek a. Election dawn ruaia party-a thuneitu sang (PAC Member 4 leh hotu pawimawh dang)-ten an chhuahsan hi khawvel political history-a la awm ngai lo a ni. An hqrs tlusawp hian Zo khaw lamah ZPM bansan hripui a leng mek a ni.
“An inzirtirna tha lo tak avangin kan mi hriatchian tak takte pawhin ZPM an nihna chu ‘thianghlim famkim nihna’ emaw tiin ZPM ni ve lo chu an rawngbawlpuite thlengin bawlhhlawh leh thil tha engmah ti lo ang maiin an diriam fo mai. Vawiina ka zawhna chu hei hi a ni, tiin, ZPM hian Mizo hnam leh Zoram tan thil tha a ti ve tawh em? Mizoram sorkarin thil tha tam tak a tihah hian an tel ve meuh em?” a ti.
MNF Adviser Pu Robert-a chuan mipuiin ZPM chungchanga thudik an hrechiang ta tiin, “Unit kan din dawn lo ti thin khan a theihna apiangah zak miah lovin an din a, MLA hlawh sang kan la ve dawn lo an tih laiin a la hmasatute an ni. MLA car man tur sum kan dawng ve dawn lo, designation plate tar ve loh tur an ti em kha? A titute hi MLA Car leina atana a sum la hmasa leh MLA designation plate pawh a tar fiah fiah an ni.
Minister Pu Robert-a chuan Finance Deptt-in RTI zawhna an chhan dan sawiin, “Covid vanga Mizoramin sum kan hmuh tur chiangsa Central-in a release loh Rs nuai 2632.32 kha kan sum harsat chhan lian ber a ni. Hei bakah, state sorkar thawhchhuah ve tur cheng vbc tam tak covid avangin kan chan (lost) vek bawk. Mi thenkhatin mipui bum nan covid tanpuina sorkarin dawng teuh teuh angin an sawi a. CM Relief Fund atanga sum tam tak awm angin dawt an sawi thin.
“Tukinah Finance Deptt hotute ka zawt a, Covid avanga tanpuina sorkar-in a dawn chu Rs vbc 70 chuang awrh chauh a lo ni a, Rs vbc 2632 nen chuan a inthlau hle. CM Relief Fund hmuh zat pawh Rs vbc 31.38 a nih thu CMO atangin ziakin ka dawng bawk. Chuvangin, sum harsatna hi State plan hnuai atanga tih ngai e.g. Healthcare scheme, Salary, GP Fund, Pension Fund etc ten an tuar lo thei lo a. Heti taka annual plan sum kan hmu kim lo chunga kan CM zara tha taka kan kal thei hi a ropui em em a. Pathian leh kan CM zahawm tak Pu Zoramthanga zara sorkar sum dinhmun a tha chho mek hi a lawmawm tak zet a ni.
MNF Adviser Pu Robert-a chuan kan hmalawka election lo awm turah hian khawi party nge sorkar tur tih in rin dik duh chuan Mizorama constituency 40 awmte hi a mal malin candidate turte nen zirchiang rawh u, a ti a. “Pathian zarah MNF-in candidate kan nei thaa mipui khawngaihna kan chan leh ngei a rinawm hle a ni. ECI-in inthlan han puang sela; mahni dinna tur bial zelah party tin candidate-te han lut sang sang ila MNF danglamna chu a lo lang chiang lehzual ngei ang. Kei hi mahni bial ngai ni lo bial thara ding tura kan hotuten an ruat ka ni a. Ka beisei ruk ang ngeiin ka dinna bial tur Hachhek mipuite khawngaihna ka dawng mek a, Aizawl E-II bial ka enkawl dante an hriat belh zel a. An bial mipuite tan theihtawp chhuah ka tum tih an hria a, min khawngaiha Hachhek bial hmasawn nana min thawhpui duhtu an pung zel hi ka lawm hle a. Kan hotute beisei angin ka bial insuan avanga MNF-in seat thar kan lak belh chuan, ‘Hei ngei hi a ni political achievement chu,’ tiin ka hlim hle ang,” a ti.
