August 15, 2023 (Thawhlehni) hian Aizawl South-II Constituency huamchhung Pu V.L Remruatpuia, MPCC Executive In, Tlangnuam Vengthar-ah mithar lawmluhna leh Party intuaitharna hun hman a ni a. He hun hi Dr. Lalmalsawma Nghaka, Treasurer MPCC in hmanpuiin Aizawl South-II huamchhunga Party hrang hrang aṭangin mithar 111 (MNF – 27, ZPM – 81 leh Neutral – 3) a lawmlut nghal bawk.
He huna thusawitu Dr. Lalmalsawma Nghaka, Treasurer MPCC chuan, “Kumin kum tawp lamah inthlanpui kan hmachhawn dawn a, Mizoram mipuiten tu nge kan ram min kaihruai atana tha ber tih hi ngun taka kan bùk a ngai a ni. Kan ramah hian hlemhletna laka fihlim hruaitu kan mamawh hmasa ber a. Kan ram min kaihruai turin thusawi thiam ringawt ni lo, a taka che chhuaka mahni insawi anga nung thin hruaitu rintlak kan mamawh tawh hle a ni,” a ti.
MPCC Treasurer Dr. Mala chuan, kan ram min hruai turin Party tin hian Chief Ministerial Candidate kan nei theuh a, chung zingah chuan Pu Lalsawta, Pu Zoramthanga leh Pu Lalduhoma te hi mipuiin kan bùk dawn a, eirukna laka fihlim leh mi dik kan thlan chhuah a ngai takzet a ni. Kan CM Candidate zingah hian Pu Lalsawta hi rorelna chang tawh, term hnih Cabinet Minister lo ni tawh, eirukna laka fihlim ngam a ni a. Sawi tawh anga awm thin a ni tih kan hre bawk, a ni kaihhruaina hnuaiah Mizoram hian hmasawnna hmel thar kan hmu ngei ang tih hi a chiang hle a ni, a ti bawk a.
Party thenkhatin, ‘Ka eiru lovang’ tih thu an tiam a, sawi ringawt a tawk lova, a taka nunpui a ngai a ni. Thu tam tak intiam a, fiahna a rawn inherchhuah huna tihlawhtling leh ngai lo hruaitu neih ai chuan mi dik leh mi rinawm a ni tih kan hriat sa, Pu Lalsawta lamah Mizoram mipuite i tang ang u tiin ka sawm che u a ni, a ti bawk.
Dr. Mala chuan, Mizoram mipuite hian an mamawh ber pakhat chu ‘HRUAITU THA’ a ni. Pathian tihna nen Congress Party hian hruaitu tha Pu Lalsawta hovin Mizoram Mipuite tan sorkar tha din turin zoram dung leh vangah nasa takin hma kan la chho mek a ni, a ti bawk.
Dr. Lalmalsawma Nghaka, Treasurer MPCC hian hemi ni vêk hian Mission Veng North Congress Unit-I & II Political Training hun a hmanpui bawk a. Pu H. Lalduhawma, President Aizawl South-II Block leh Party hruaitu dang te’n an ṭawiawm bawk a ni.
