Vawiin August 18, 2023 (Zirtawpni) hian “Sakhaw zalenna leh Ram leilung fate hamthatna humhalh” tih thupui hmangin Vanapa Hall-ah Vantlang inkhawm neih a ni a. Pu Lalsawta, President MPCC, Pu Vanlalruata, President PC Party, Pu H. Lalrinmawia, President ZNP te’n thu an sawi bakah ‘Sakhaw zalenna duh intelkhawm pawl ‘Mizoram Secular Alliance’ tih hming vuahin thawhhona thuthlung an ziak a. Pu John Siamkunga, GS MPCC te’n thu an sawi a. Dr. Lallianchhunga, Chairman Media Department MPCC chuan kalkhawmte pawmpui tur Resolution a pu lut bawk.
He huna thusawitu Pu Lalsawta, President MPCC chuan, Mizorama Secular Alliance kan thawhho hi kan hnam damna a ni a. India ramah Hindu Lalram buatsaih tumtu BJP leh a thawhpuite hi Kristian anga kan dodal a ngai a. Political Party, Kohhran leh NGO ang pawha kan do a ngai a ni. India ramah leh Mizoramah sakhaw zalenna a awm a ngai a. Chuvangin, MNF Party leh ZPM Party te pawh ‘Mizoram Secular Alliance’ zawm ve tûrin ka sawm a ni, a ti a. Mizorama Kohhran hrang hrang leh NGO hruaitute pawh ram leh hnam humhalhna kawnga hma kan lakho zelna atan Mizoram Secular Alliance zawm turin ka sawm vek che u a ni, a ti bawk.
‘The End of India’ tih lehkhabu ziaktu Khushwant Singh chuan ti hian a lo sawi a. ‘India ram hi pawn lam atangin an rawn ti chhe dawn lo. A chhung atangin, a chhunga chêngte inepna leh intihbuaina avangin a tawp thei a ni,’ a lo ti a. Chumi hun a thlen loh nan leh Sakhaw zalenna nei tûrin tuna kan hun tawn mek hi kan siammhat a, a siamthatu kan nih a ngai a ni, a ti.
Pu Lalsawta chuan, India ramah hian Missionary-te an chep takzet tawh a. Thil hlu leh tangkai ram pawn atanga tanpuina pawh an dawng thei tawh lo. He BJP hian Mizote Sihhnipna lai an man em em a, an fing a ni. Mahse, he ramah hian Congress Party, sakhaw zalenna duhtu kan la awm a. Missionary ten thlamuang taka Pathian rawng an bawl leh theihna tûrin lungrual taka ‘Thawhhona’ (Alliance) a tel hi a hun takzet a, chuvanga thawhona siam kan ni, a ti a. Pu Lalsawta’n tunah hian a sawm lo che u a, Pu Vanlalruata’n a sawm hek lo che u. Pu H. Lalrinmawia pawhin a sawm lo che u a, Ramin a ko che a, a sawm zawk che a ni, a ti bawk.
Congress Party hi India ram leh Mizoramah Sakhaw Zalenna kulhpui a ni reng dawn a. Ram mipuite thlamuanpui tham nih zel kan tum bawk a ni. Kan ram, kan hnam, kan sakhaw humhim turin Mizorama Party hrang hrang te, Kohhran leh thlarau mi te, NGO leh Mizoram mipui zawng zawng ka sawm che u ni, a ti bawk.
Pu Vanlalruata, President PC Party chuan, Mizoram hi Anti-BJP kan nih a ngai a. Hei hi kan Ram, kan Hnam, kan Sakhua a himna atan a tul a ni a ti a. BJP hian Hindutva kalpui a tum mekah leh UCC (Uniform Civil Code) din an tumnaah hian Mizoram hi min rawn rin lut ve malh suh se. Kristian te’n he thil hi kan duh lo a, kan do tlat dawn a. Do ve duh rih lo Party te pawh Mizoram Secular Alliance a tel ve turin ka sawm nghal bawk a, Kristian kan nih anga lungruala do tûrin ka sawm a ni, a ti a.
Pu Ruata chuan, kan ram sum dinhmun chhiat avanga hrehawm ti thalai an mhahnem em em tawh a. Thalaiten thil tak tak an ngaihtuah tan tawh a ni, a ti a. Tun hnaiah kan hnam dinhmun chu Burma, Bangladesh leh Manipur boruakah hian a chiang hle a, kan buai zual zel a nih hi! UCC leh India Danpui atanga ‘sakhaw zalenna’ paih avangin kan buai zual zel thei a. Mizoram hi a tuar theih dinhmuna ding mek kan ni bawk. Forest Conservation (Amendment) Act avangin kan ram kan chân thei a, Assam laka ram zau tak chân thei dunhmunah kan ding mek bawk a ni, a ti a.
Pu Vanlalruata chuan, BJP chu sum hmatheha che – MNF pawh sum hmatheh bawk. ZPM lah chu sum hmachhuan tumin an buai (Moral degradation) mek bawk a. He’ng zawng zawng lak atang hian talchhuah theih a ni. Sum dinhmun thalo te hi a siamthat theih bawk a. Mipui hnena chanvo tha zawk pek hi sorkar tha tih tur a ni a. Nang leh kei hi kan pawimawh em em a ni. Tun huna kan awmdan siamtha tura hmala turin Pathianin min duh vang a ni ang, vawiinah pawh Mizoram Secular Alliance a lo pian tiin, kan Pathianin min pui ang a, kan tanrual phawt chuan kan siamtha vek thei ang, a ti a.
Kristianna hi a tha bik a ni tih kan lantir a ngai a, kan Pathian chawimawi tur te; kan chhehvel hnamte aia ropui zawk kan nih lan tir tur te; Zohnahthlakte inpumkhatna atana kan unaute hipkhawm tur tein Pathianin ram min siammhat tir dawn a. Chumi atan chuan Rorelna Dik leh Sorkar Tha – Ram leh Hnam humhalh ngam, Thalai leh thang thar zelte chhawr tham, Sorkar ruhrel leh inawpna siamtha ngam, Dan dik taka lekkawh ngam, Langtlang, Eiru (Corrupt) hrem ngam, Mipui nawlpui hamthatna pe thei, Ram hausakna leh hmasawnna ruhrel dinsa hmang tangkai thiam, Hmasawnna ruhrel din thei, Sumdawnna awmze neia kalpui tura theihtawp chhuah tûrin leh Mizoram Secular Alliance thlawp vek turin Mizoram mipuite ka sawm che u a ni, a ti bawk.
Pu H. Lalrinmawia, President ZNP chuan, Inlarna tih dik tuma ram hruai hi a tha lo a. Dikna leh rinawmna nena ram hruai hi a tlo ber a, kan ram kan hnam a damna tur chuan kan inlungrual ang a, a tul chuan kan thawkho mai tur a ni. Manipur boruakah pawh mizote kan inlungrual em em a, kha thil kha BJP te’n Hindutva an kalpui zel duh lohna nen a inzawm tlat niin a lang bawk a ni, a ti.
Astrologer pakhat chuan, India ramah BJP in Party mala chak taka rorelna a lekkawh hunah India hi phel 7 ah a la phel ang tih hi an lo sawi lawk tawh a. Kei pawhin chanchinbuah ka lo ziak ve tawh a, chu chu a lo thleng dik man mek a ni, a ti bawk.
Pu Rinmawia chuan, kan MP te khan Aizawl an lo thlen khan eng nge an sawi? Thusawi ka dil a, mahse an phal lo ti an awm a. Ram leh Hnam himna atan chuan microphone pawh off mah se an ding ngam tho tho tûr a ni, a ti a. Kan nun hi Pulpit tlanga kan thusawite nen hian inmil se la, Pathian lam mang Kristian ni tlat ila, BJP hi tuman mawngzawm tawh suh se. BJP hian a mihring (mizote) hi min duh lo. Kan ram chiah hi a ni an duh, a ti a. Chakna ni lovin, thiltihtheihna ni lovin ka thlarau zawkin le ti mhin Krisitian te kan nih angin ‘Mizoram Secular State’ a lo tel vek turin Kristian tawh phawt chu kan sawm vek che u a ni, a ti bawk.
Pu John Siamkunga, GS MPCC chuan, UCC kan sawi thin a, NE kan him dawn a lawm an ti thin a, kan him theih chuan Uniform a ni lo, kan him theih kan ring lo. Home Minister Amit Shah-an nangni chu inhim dawn a tih hi kan sakhaw Puithiam/Pastor te sawi aiin kan ring zawk ta tlat em ni? a ti bawk.
UCC a hlauhawm loh tia kan sawi thin hi a mak ka ti a. Jawaharlal Nehru hunlaia Hindu code bill siam nen kan sawi pawlh thin. Kha’ng kha chu Hindu tan bik a ni a, keini Kristian te min huam ve lo. Anmahni Hindu bik inenkawlna tura siam a ni. Tuna UCC kalpui an tum hi chu kan vai huap a ni a, sakhaw tin a tel vek dawn a, dan khat hnuaia tihdan thuhmun, a lian ber Hindu duhdana kal tumna a ni, a ti a. UCC duhlo hian kan mithiam IAS leh IPS rual ten PM Modi hnenah an duhlohna an lo thlen hial tawh a ni, a ti bawk.
Pu John Siamkunga chuan, Anti Conversion Bill awmna hmunah sakhaw zalenna a awm thei lo a. Congress lalna hmunah chuan zalenna a awm thin a, mipui vantlang tana thatna a awm thin. Congress chuan sakhaw zalenna awm theih nan Constitution a Preamble ah Secular a telh hial tawh a ni. Sakhaw zalenna Secularism hi kan vawnhim a ngai a, kan vawnhim loh chuan kan chan hian maian chan pawh a tluk lovang, a ti bawk.
Dr. Lallianchhunga, Chairman Media Department MPCC chuan Resolution a chhawp chhuak a. Kalkhawm mipui te’n lungrual takin an pawm a ni.
RESOLUTION:
India rama BJP leh a thawhpuiten kum 2014 atanga sorkarna an siam hnua Hindu lalram din tuma hmalakna leh sorkar laipui dan siam hmanga hnam tlem zawk leh tlangmi (tribal) te nek ral tuma hmalakna chak taka kal mek hi Mizoram Secular Alliance chuan ngawi renga thlir liam mai mai chi-ah a ngai lova. Hindu lalram din tumna hian sakhaw tenau zawk te nek ral tumna a ken tel tlat avangin Kristian Missionary te’n Chanchintha hrilhna kawngah harsatna an tawk mek a, khawvel mit hmuhah India ram hi Kristian te tana ram him lo langsar takah a chantir mek bawk a ni. India ram hi sakhaw tenau zuitute leh hnam tlem zawk te tana ram nuam leh him a nih theihna atan BJP leh a thawhpui pawlte chu hnawl ngam turin Mizoram Secular Alliance chuan Mizoram mipuite kan ngen a. Hetihrual hian BJP sum chakna beiseilotu zawng zawng te chu kan Ram, kan Hnam leh kan Sakhua a dam khawchhuah theih nana Mizoram Secular Alliance-ah hian lo tel turin kan sawm nghal bawk a ni.
Tin, Mizoram Secular Alliance a telte hian thawhhona thuthlung a hnuaia mi ang hian an ziak nghal bawk a ni.
MIZORAM SECULAR ALLIANCE (THAWH HONA THUTHLUNG)
Vawiin August 18, 2023 (Zirtawpni) hian keini, Mizoram Pradesh Congress Committee, Peoples’ Conference Party leh Zoram Nationalist Party te hian kan ramah sakhaw zalenna a lo awm theih nan leh kan ram, kan hnam a lo him theih nan kan thawkho a ni tih kan nemnghet e.
(LALSAWTA)
President
MPCC
(VANLALRUATA)
President
PC Party
(H. LALRINMAWIA)
President
ZNP
He hun hi Dr. Lalmalsawma Nghaka, Treasurer MPCC chuan a kaihruai a. ‘Ro min rel sak ang che’ tih hla chu manna atana sak a nih hnuin, Rev. Lianhmingthanga Sailo chuan hunserh a hmang a. Pu Lal Thanzara, Vice President MPCC chuan lawmthu a sawi a. Pi Zualbawihi chuan zaiin kalkhawm mipuite a awi bawk a ni.
