Mimbung 8th April, 2022 : April ni 7, 2022 khan Pu Lalduhoma, ZPM Leader chuan Lengteng Constituency chhunga Kawlbem, Teikhang, Hrianghmun leh Mimbung khua te tlawhin vantlang inkhawm a nei a, ZPM zawm thar voters 591 a lawm lut bawk.
Pu Lalduhoma chuan, “ZPM kan sawrkar chuan minister ten ngaihtuah chawp ngai lovin kan hmalak dan tur ‘road map’ kan nei thlap tawh a, kalphung ṭha zawk leh system mumal zawk kan siam dawn a ni,” a ti a. “Party-ah ni lovin policy a rinawm turin kan inzirtir a ngai tawh a, party ruihchilhna hian kan ram a tichhe nasa tawh em em a, keini chuan ‘sem policy’ hi tihtawp kan duh a ni,” a ti bawk.
Pu Duha chuan, “Thingtlang kut hnathawktute tan budget-ah pawisa dah a ni ve ngai lo va, ZPM erawh chuan kut hnathawktute thlai chi kan inchintir ve a nih pawhin a tawp kan thlenpui dawn a ni. Kumtluana risk laa hna inthawhtir hi tihtawp kan duh a, sawrkar hnathawkte leh sumdawngte’n an sum thawhchhuah tur rate an hria ang hian kut hnathawktute pawhin kan sum thawhchhuah tur zât kan hre ve tawh dawn a ni,” a ti bawk.
Pu Duha chuan, “Sawrkar hna lak chungchangah pawh kan fair dawn a, MSSSB te hi kan ṭhiat nghal dawn a, a tha leh tling chu kan la mai dawn a ni,” a ti bawk.
Pu F. Rodingliana, ZPM Consultant pawhin thusawiin, “ZPM chuan ram tan hmachhawp tam tak kan nei a, kut hnatkawktute tan hmachhawp kan nei a, chutiang bawkin sumdawngte tan leh lekhathiam leh thiam lote tan pawh hmachhawp kan nei a ni,” a ti a. “Ni 100 chhunga tihhlawhtlin tur kan duang a, kum 2 chhunga tih tur kan duang a, kum 5 chhunga tih tur kan duang a, chutiang zelin kum 7 chhungin Mizoram hi intodelhtir kan tum a ni,” a ti bawk.
Pu Lalduhoma hian Lengteng Constituency a fang kual mek a, khaw hrang hrangah vantlang inkhawm neiin khawtlang mipuite’n an hlut thei hle a ni.
