Tuichang bial fanga fehchhuak mek Pu Lalduhoma, ZPM Leader chuan vawiin khan Tualte leh Hmunchengah te vantlang inkhawm a nei.
Pu Duha chuan, “Tunlai kan ram dinhmun kan thlirin kan ramin bung thar kan kai dawn niin kan hria a, kan rama rorel tawh party pahnih te kan thlirin mipui hian kalphung thar kan mamawh tawh a ni tih hi mipui ngaihdan leh thlir dan a ni tawh a ni. Party pahnihte hi an ṭha lo kan ti lo va, an theih tawkin hna an thawk a ni. Amaherawhchu, an hruaitu lu ber ten ram leh hnam aia party leh mimal hamṭhatna an ngaih pawimawh zawk avangin kan ramin a nih tur ang a ni thei ta lo a ni,” a ti.
Pu Duha chuan, “ZPM chuan mithiam rual te nen ngun takin kan zir ho a, a bul aṭanga a tawp thleng, a chin aṭanga a hralhna tur hre sa vekin thlai kan ching dâwn a ni. Congress leh MNF sawrkar chhung zawng pawhin thlai chi hrang hrang kan ching tawh thin a, amaherahwchu a market mumal tak a awm thin loh avangin mirethei kan insiam belh nasa em em a ni. Party sawrkar ni lo, mipui sawrkar kan din dawn avangin a taima leh thar chhuak hnem apiangin budget an sawk hnem mai dawn a ni. Kuthnathawh hi tih tawp kan tum lova, kan uar sauh sauh zawk dawn a ni. Kumtina lo neih kan sawn thin erawh hi chu zawi zawiin tih tawp kan tuma, tunlai thiamna changkang zawk khawl leh thil dang hmangin thlai hmun nghet din kan tum a ni,” a ti bawk.
ZPM Leader chuan, “Chhungkaw tin hian thiam zawng leh tuina kan nei vek a, amaherawhchu bulṭanna kan neih loh avangin eizawnna ngelnghet zawk din kan harsat thin a ni. A bik takin thalai te zingah enterpreneurship lamah hma kan sawn nasa hle a, heng thalai taima leh thiamna pawh nei sang bawk si hi keini chuan kan ngai pawimawh em em a ni. Mi taima leh remhria te kum 5 chhunga chawikan hi kan party thil tum pawimawh tak a ni,” a ti bawk.
Pu Lalduhoma hi General Headquarter atangin hotu thenkhat ten an tawiawm a, Khawzawl ZPM North block hruaituten an tawiawm bawk a ni.
