Lalduhoma, Leader ZPM chuan Hrangturzo constituency huam chhunga khaw hrang hrang a fang kual mek a vawiin khan Leng, Sailulak leh Mualcheng khuaah te vantlang inkhawm a nei.
ZPM Leader chuan, “Pathian leh mipui zara sawrkarna kan siam a nih chuan power kan ngai pawimawh em em dawn a. Kan policy tam tak pawh hi power tel lo chuan a tihhlawhtlin theih loh a ni. Vawiinah chuan kan basic needs a dang ve zel a, gas te pawh hi kan basic needs a ni tawh a, mobile phone-te pawh hi mi tam tak tan chuan basic needs a ni tawh a ni,” a ti a. “Hand holding policy kan nei a, chhungkaw tin ten hmuingilna bik thil kan nei theuh a, mahse bultanna kan nei si lova, kan tih theih kan thiam ve reng kha kan ti thei lo thin a ni. Chutiang mite chu party sawi lovin mi taima dinchhuah tum kha kan pui mai dawn a ni. Party sawrkar nilo mipui sawrkar kan din dawn avangin mi taima leh puih tlak, mi tum ruh leh hlawhtlin tum ngei te chu party sawi lovin kan pui mai dawn a ni,” a ti.
Lalduhoma chuan, “Thlai thar lei kan sawi thin a, thlai thar zawng zawng kan lei thei dawn lova, kan lei tur kha a rate kan sawi lawk dawn; A tam zawk erawh chu kan sawrkar hnuah kan puang dawn a ni. Crop insurance kan hmang dawn a, khuarel chhiatna avanga kan thlai te a lo chhia a nih pawhin a lu man tel tur kan nei tawh dawn a ni,” a ti. “Mizoram ei chhetu ber chu eirukna a ni. MLA hlawh atang hian in tha tak tak sakte, in hmun tha tak tak lei te hi a theih loh, term khat MLA te, term khat Minister ten in tha leh ropui tak tak an sak hian mipui chanai an ei a ni. Kan chanai eiru duhte hian kan ram hi an ei chhia a, hetiang mi hi vote lo ngam turin kan in chah duh a ni. Corruption control hi a ngai em em a, Pathian leh mipui zara kan sawrkar a nih chuan Lok Ayukta hi kan ti chak ang a, Chief Minister thlenga chhui theiin kan siam dawn a ni. India ramah state tlemte CBI ko lut ngam lo an awm a, chung zingah chuan Mizoram hi kan tel a ni. Pathian zara kan sawrkar chuan CBI hi kan ko lut dawn a ni,” a ti bawk.
ZPM Leader chuan, “Kan sawrkar atangin ni 100 chhung hian kan ram hmelhmang hi thlak kan tum a, mipui mimir ten politician an thlir dan hi thlak danglam theih kan in beisei. MLA fund te hi dik taka hman chuan bial chhung tan hmasawnna tam tak a thlen theih a, oppsition MLA ni chung pawh hian thil tam tak a thawh theih a ni,” a ti bawk. “Sem policy hi Bible kalh a ni tih kan hria a, mahse ngampa takin kan la kal pui ngam a ni. Sem policy hi Congress in an ti chhuak a, policy reng reng hi term khat atana duan a ni a, term khat chhungin an intiamna pe zo duh lovin a leh pekah min thlan tlin leh chuan kan pe leh ang che u an ti a, kum 10 kan thlang tling thin a ni. Sem policy hi a tir atangin inbumnain an tan a, min bumtu ngai hi kan in bum tir mai mai thin a, tunah chuan kohhran a au chhuak ta hial a nih hi,” a ti a. “Vawiinah hian politician kan nih avang ringawtin party a kan awm a tha tawh lova, ringtu kan nih na avang hian party-ah kan awm a ngai a ni. Kohhranin a duh loh, nasa taka a do policy zuartute party a rawngbawltu kan la awm te hi kan tih hauh loh tur a ni,” a ti bawk.
