Parva Join Action Committee Meeting chuan, Parva Government High School zirtirtu V. Lalhmangaihzuala chu a aiawhtu tur dah lova, Lungtian Gov’t High School a transfer a ni chu hriatthiam har an tih thu an sawi a, a rang thei ang bera transfer order hi sut leh turin sawrkar thuneitu an ngen.
Parva Join Action Committee chuan, kum tam tak hnu a regular teacher an neih ve chhun, V. Lalhmangaihzuala transfer a ni chu, Khawtlang hruaituten an pawm lova, a transfer order hi sut leh a nih hma chu, Parva Joint Action Committee chuan an khua a chhuahsan lohna turin dan an tum a. Zirna in zawng zawng pawh tiamchin awm lovin an khar nghal.
Parva Government High School hi Parva leh a chhehvel tan zirna in sang an neih chhun a nih avangin an hlutin an tan a pawimawh hle a. Amaherawh chu Sawrkar school ni chungin ngaihsak an hlawh ngai lova, kumtin zirtirtu kim lovin session tawp thlengin school hi an kal thin tih an sawi. Chuvangin naupang ten harsatna an tawk nasa thin hle a ni.
Zirtirtu indaih loh chungchang hi NGO leh pawl hrang hrang ten sawrkar thuneitu te hnenah vawi tam tak an thlen thin a. Middle School atangin Chakma pahnih attached-in an dah a, high school regular teacher pangai dah tur leh Mathematics leh Science teacher dah tura thuneitu te hnenah ngen ni thin mahse hmalakna a awm ngai lo niin Parva JAC chuan an sawi.
Tin, Headmaster hi Chawngte a awm a ni a, khawtlang hruaitu ten theih tawpin nawr thin mahse school a kal ngai lova, District Education Office (DEO) lamah pawh a chungchang thlen thin ni mahse hmalakna a awm ngai loh avangin khawtlang hruaitute pawhin tihngaihna kan hre tawh lo a. Zirtirtu pathum chauhin school hi an enkawl ve hram hram thin niin JAC chuan an sawi.
Parva Government High School-ah hian, regular teacher pakhat an nei ve a, chu pawh chu Lungtian Gov’t High School-ah transfer sak a ni leh a, chu vangin tunah hian regular teacher an nei tawh lova, zirtirtu awm chhun chu Middle School atanga attached-a an dah chakma pahnih chauh an ni tawh a ni.
Hetiang hi an khawtlang zirna school dinhmun a nih avangin, transfer tak aiawh dah tumna pawh a awm lova, sawrkar in V. Lalhmangaihzuala transfer order a tihchhuah hi, thingtlang mite zirna ngaihsak lona leh inhmuhsitnaah Parva Joint Action Committee chuan an ngai a. Chuvangin, a rang thei ang bera transfer order hi sut leh turin an ngen a ni.
