Mizoram Presbyterian Kohhran hnuaia Committee sang ber, Synod Executive Committee vawi 298-na, ni thum awh tur chu Thawhlehni atang khan Aizawlah an thu tan a. An thurel tur zingah pastor pension-te politics-a an inhman dan tur kaihhruaina siam rawtna a tel.
SEC thutkhawm hi Synod moderator Rev Dr Vanlalnghaka Ralte chuan a kaihruai a. Thurel tur 126 awm zingah – Mixed Marriage Dan enfiah, tun aia chak zawka Synod Prison Ministry kalpui dan tur, Kristian nun kaihhruaina inzirtir thar rawtna, SBI-ATM Counter Synod Office-a hawn, minister/ pastor thawk lai thi nupui fanau chhawmdawlna, Synod Relief rate ennawn rawtna, contract hlawh category ennawn rawtna, pastor pension-te politics-a an inhman dan tur kaihhruaina siam, Josepha Buhzem kalpui dan tur, KTP General Conference Diamond Jubilee lawm dilna, kohhran inpumkhatna atana hmalakna, PCI General Assembly vawi 45-na thlengtu tur ruat, India Act East Policy zirchianna leh rawtna, kohhran inkhawm leh inkhawm dang tihtlem dan ngaihtuah, Mizoram Christian College Master Plan chungchang, Chakma tawnga Holy Bible siam, Synod Hospital kum 100-na (Centenary) puala project ruahman, Sikulpui-a ‘A’ pawl leh ‘B’ pawl hawn belh dilna, 2023 MLA inthlanpui atan Pastor bial hrang hrangah revival speaker-te tirh chhuah rawtna, Employees State Insurance
Corporation (ESIC) zawm chungchang leh Pathian Biak Inkhawm Hruaina Bu enthat rawtna te a tel.
SEC 298 hi November 10-a zawh tura ruahman a ni a. Aizawl atangin member 44 leh Aizawl pawn atangin member 89, an vaiin member 133 an tel.
