Vawiin June ni 23, 2023 (Zirtawpni) hian Mizo Hnam Run ah chhung inkhawmna neih a ni a. Hun hnihnaah Pu Vanlalzawma, MNF Vice President chuan thusawiin, “MNF hi Pathian in a hre reng thin a, a tanpui thin. Tunhnai chhova inthlana kan chet that tawk lohna te chu, opposition party te boruak thalo leh chetchhiatna ten a hliahkhuh leh thuai a. Chu chuan party mipui min tiphur thar leh a, sorkar leh ngei turin kan bei a. Kan sorkar leh ngei pawh a beisei awm hle a ni. Hengte hi Pathianin kan thatna tura rem a ruatna zel a ni,” a ti.
Pu Zawma chuan Kolodyne Multi-Modal Transit Transport Project (KMMTTP) chungchang sawiin, “He project hi peihfel a ni thuai dawn a. A hlawhtlin hunah chuan kan hawilam kan thlak deuh vek dawn a ni. Paletwa leh Sittwe ah te Lawng chawlhna peihfel a ni deuh vek tawh a. Bungrua tam zawk chhimlam atangin man man zawkin kan chawlut tawh dawn a. Phai lam atangin bungrua leh mamawh Mizoram kaltlangin an rawn la tawh zawk dawn a ni,” a ti.
KMMTTP a hlawhtlin theihna atan, hun hmasa lam atangin kan hruaitute, Pu Zoramthanga leh Pu Tawnluia te leh MP ten tha an thawhhlawk hle a. External Affairs Minister leh khawchhak lam changtu Foreign Secretary te hmu in, chak taka file a kal theihnan theihtawpin hma kan la a. Kum 2008, April ni 2-a India Vice President leh Burma Vice President ten he project agreement an sign tum pawhin CM Pu Zorama hoin kan tel ve nghe nghe a ni, a ti.
