Congress party chuan thuchhuah siamin, “MNF sorkar hian Mizoram State Health Care Scheme (MSHCS) hnuaiah damlo bill pek theih loh Rs. 6,31,250,126 (cheng vbch sawmruk pathum, nuai sawm pahnih, singnga, za leh sawmhnih paruk) a nei mek a, hei hi Nov.30,2022 thlenga mi 22,490 te MR bill sorkarin a bat tlingkhawm a ni a. Kum kallai meka Healthcare a inziaklut zawng zawng 39,505 atanga 56% chuang damlo bill a batsak mek tihna a ni. RTI chhanna atanga a lan danin kum 2021-2022 leh 2022-2023 Financial Year kallai meka damlo bill te hi pek ala ni lo hrim hrim a. Hetianga kum 2 dawn damlo bill pek a ni lo hi Congress party chuan hriatthiam theihah kan ngai lova. Damlo bill pek an nih loh avanga damdawia inenkawl chhunzawm thei lo chhungkaw tam tak te tawrhna a thleng mek hi Congress party chuan pawi kan ti takzet a ni.
Damlo bill bat mek dan:
Source: RTI Chhanna 14.12.2022
“Hetianga MSHCS hnuaia inziaklut damlo ten harsatna an tawhna chhan ber chu damlo bill pek hi Finance Minister leh Chief Minister ni bawk, Pu Zoramthanga ngaihpawimawh zawng a nih loh vang niah Congress party chuan a ngai a. A duhsak zawng Contractor mi tlemte te tan bill lakah harsatna a awm ngai loh laia damlo mi 22,490 te MR Bill tun thlenga MNF sorkarin ala pe thei lo hi mipuite hriselna a ngaihthah vang a ni. Tuna Healthcare bill an pek chhuah chak loh dan atanga chhut chuan kum 2023 MLA inthlanpui kumah pawh damlo bill te hi an pe chhuak vek hman dawn lo tihna a ni a.RTI chhanna atanga a lan danin Healthcare tana Asian Development Bank (ADB) atanga loan an puk tur pawh engtikah nge an rawn pek dawn tih hriat theih a ni lo.
“Pu Zoramthanga kaihhruai MNF sorkar hian mipuite hriselna a ngaihthah thin tih an sorkar hmasak (1998-2008) a Falkawn Referral Hospital an tihchhiat dan atang khan a chiang tawh a. Tunah chhungkaw tam takin an thlamuanpui thin Healthcare an tichhe leh mek a, mipuiin rintlakah an ngaih tawh loh avangin MSHCS/healthcare a inziaklut pawh chhungkaw 39,505 chauh an ni ta. Hetiang hi kum hmasa lama MSHCS hnuaia inziah luh dan a ni:
Source: RTI Chhanna 22.7.2022
“Congress party hian sorkarna a siam (2008-2018) laiin mipui hriselna hi a ngai pawimawh thin a. Falkawn Referral Hospital tlu chhe tawh pawh a siam tha a, Medical College changtlung takah a din chhuak a, Mizo thalai tam takin MBBS an zir theih phah a ni. Pathian leh mipui zarah Congress party in sorkarna a siam leh chuan Healthcare hi changtlung takin, mipuite thlamuanpui thamin kan kalpui leh ang. Chumi tithei tur chuan mipui thlawpna kan ngen nghal bawk a ni,” tiin Congress party chuan an thuchhuahah chuan an tarlang.
