Ni 23 September, 2022 khan Congress party chuan Bhavan-ah Zirtawpni Chhung Inkhawm (Friday Political Session) an nei a, he hunah hian MPCC President Pu Lalsawta’n thu a sawi.
MPCC President Pu Lalsawta chuan, ‘thla 2, thla 3 lekah khian Krismas kan nei dawn a. Hei hi he sorkar, Zoram mipuiin a thalo an tih em em, mipui aia mahni inngaihsak, mahni dinchhuah tum te Krismas hnuhnung ber ni tur atan keini hian kan siam thei a ni. Vawi khat chiah Krismas hi he MNF sorkar hnuaiah hian kan la hmang dawn a. Chuvangin, theihtawpin I tang tlang ang u’, tiin Zoram mipuite a sawm.
Mizoram sum leh pai siamthatna kawnga sulhnu chhuanawm tak hnutchhiahtu, Finance Minister hlui Pu Lalsawta chuan, ‘tunlai hian sorkar remhre lo lui hianin lirthei te Pollution Emission hi an buaipui a. Keini pawh kan motor te kan buaipui a, zing dar 6-ah an va intlar a. A intlar, an rawngbawlsak, chhiah petute, an hlawh, an chhiah atanga an pekte hianin an rawngbawlsaka te hi an ngaihtuah lo hlein ka hria a, sorkar hian remruatna dang a siam thei a ni. Chutichuan Office hun pangngaiah an lo kal a, chawhnu her a han thlen hian tih hmabak pawh nei mahsengin an haw tir tawh mai a, lo kal belhte an awm pawhin. Khatiang khanin mipui tana remchanna leh remruatna fel, a tu a te tan pawha tha ang kha tih a awm lova. Heng ang te hi chu Petrol Pump-ah te pawh hian a test na khawl, man to lutuk lem lo ang chu a bun fer fur thei a. Tunah chuan hmun 3/4 velah an bun a ni awm e. Mizoram chhungah hian hmun 500 velah bun se chuan mipui hi kan buai vak lovang.
‘Heng ka sawi nachhan hi chu Pathian zara kan sorkar theih chuan ‘ease of doing business’ kan tih, mipui rawng kan bawlna a, a awlsam thei ang zawng ber, a remchang thei ang zawng ber, midang tikhawlhkham lo leh midang tana harsa leh nghahrei ngaite emaw, heng ang chi zawng zawng hi ti boin, awlsam leh nuam leh, dik leh thain tih kan tum dawn a ni’, a ti bawk.
Congress party Zirtawpni Chhung Inkhawm hi Lalhruaitluanga Kawlni, Secretary, MPCC in a kaihruai a. Department leh Frontal hrang hrang atangin Report ngaihnawm tak tak ngaihthlak a nih bakah Pu K.Lalnunmawia, Gen.Secy MPCC pawhin thu a sawi.
