MNF Party chuan thuchhuah siamin, “Chief Minister Pu Lalduhoma chuan nimin ni 31.3.2024, Easter Sunday khan Aizawl North Treasury leh South Treasury te tlawhin an hnathawhte a enfiah a. Chief Minister hi Adviser to CM (Finance) Pu TBC Lalvenchhunga leh official lian ṭhahnem takin an ṭawiawm bawk a ni,” an ti.
Thuchhuahah chuan, “Mizoram Chief Minister, kohhran Upa lehnghalin Pathianni, Pathianniah pawh Kristian-te ni pawimawh bik Easter Sunday bawhchhia a, sorkar office tlawha an hnathawh a enfiah hi Mizorama thil la thleng ngai lo a ni a. Pathian ni ni lo, office enfiah leh tlawh hun tur a tam tehlul nen Pathian ni kher office tlawh nana Mizo CM-in a hmang duh hi MNF chuan mak kan ti a, Mizoram CM-in kristianna a lak thutak loh zia leh a lak lap zia a lang chiang hle a ni. CM Pathianni zah loh kan nei hi a pawi hle.
“Inthlanpui leh thil pawimawh dang Pathiannia ruat a nih ṭhin dodala Mizo Kristian-te kan lo ṭanrual tawh ṭhin laia, kan CM berin Pathianni zah lo taka chet a la ta mai hi MNF chuan pawi kan ti hle a. Hun kal zel turah Pathianniah thil pawimawh India sorkar-in Pathiannia a rawn ruat leh a nih chuan kan CM hian mawh thuk takin a phur dawn a ni.
“Kan CM hian Kristian CM a nih hi hrerengin tunhnuah chuan Pathianni zah tawh turin MNF chuan Pu Lalduhoma hi a chah a ni,” an ti bawk.
