Pawisa thir dawng duh lo dan anga hrem theih a ni

Lawngtlai District Consultative Committee (DCC), District Level Review Committee (DLRC) leh District Level Security Committee (DLSC) chu an Chairman, Lawngtlai Bawrhsap Amol Srivastava hovin vawiin khan DC Conference Hall-ah an thu khawm.
Thut khawmah hian pawisa thir (coin) hman chungchanga harsatna leh pawisa thir dawng duh lo leh kir tur nei lo dawrkai an awm avanga harsatna sut kian dan tur sawi ho a ni a. Pawisa thir chu sawrkarin hman theih tura a siam chhuah a nih thu leh tihtawp tumna a awm loh thu tar lan niin, dawn leh hman a hlauhawm lo va, dawng duh lo chu dan anga hrem theih zawk an ni tih sawi lan a ni a. Pawisa hi lehkha aia thira siam a hautak loh zawk avangin thir her chhuah a tam deuh deuh thu te, pawisa thir chu pawisa leng vel atana ruahman a nih thu te, pawisa thir hman loh chuan dawr thil leh chawhmeh man bulthut (base price) a tihsan dan leh pawisa nawi awm loh chhuanlama pawisa nawi aia thil zawrh dang inkir mai emaw, pawisa nawi inkir kim loh emaw a tihhluar dan te, chumiin tul lova mipui sum hman ral a tihpun thu te tar lan niin, he’ng harsatna hrang hrang hi sut kian a nih theih nan Lawngtlai District mipuite, dawrkaite leh bank-te chu pawisa thir dawn leh hman kawngah tim lo tur leh hnar lo turin Committee chuan a ngen a ni.
He thut khawmah hian mi harsa zawkte leh kut hna thawktute hnena a tam thei ang ber sum puktir (loan pek) a, chumi hmanga an dinhmun chawi kan chu DCC-in a tum ber pakhat a nih thu tar lan niin, agriculture kaihhnawih loan pek chhuah a tam zawk theih nan line department leh bank lam te’n tan la chho zel se, tih a ni a. Loan chhia a awm loh nan sawrkar ruahmannaa loan pek chhuah a nih dawnin line department leh bank te’n a nihphung leh rulh dan tur te chiang taka inhrilhfiahna leh inzirtirna buatsaih hmasak thin ni se, tih a ni bawk.
He hunah hian Lawngtlai District chhunga bank hrang hrang te’n kum 2022-23 chhunga loan an pek chhuah tur zat target tukna, ‘Annual Credit Plan 2022-23’ chu Chairman, Lawngtlai Bawrhsap chuan a tlangzarh nghal a ni.