Vawiin 10.08.23 khan Chief Minister Pu Zoramthanga chuan West Phaileng Playground-ah Community Service Centre leh Artificial Football Turf a hawng a, “Hengte hi lung kan phum lai kha covid vang lai a ni a, tuna a hlawhtlinna hi mitthla phak a ni lo,” a ti.
Mizoram State Sports Council hnuaia hmalakna – New West Phaileng (Bethlehem Veng)-a Community Service Centre (Under PMJVK Rs 140 lakh) leh West Phailenga Residential School-ah Artificial Football Turf (Under PMJVK Rs 549.91 lakh) hawnnaah hian Pu Zoramthanga chuan phullem khelmual leh a sira sports school, building, hall, etc. din takte hi kum 2018 khan sawi lawk ila in nuih a za ngawt ang a ti.
“Covid kara hetiang hmasawnna lo thlengte hi in MLA inpekna vang a ni,” a ti a. Inthlan leh hunah pawh mipuiten MNF lam hawia vote an pek ngei a rin thu sawiin, “He bialah hian Pu Rintluanga tluka hmasawnna kalpui nasa an la awm ngai lo. MLA 40 zingah kawngpui siamna tur pawisa Rs nuai 7000 chuang sawi chhuak thei awm chhun a ni, a ti a. “Party dang candidate-te an tha lo ni lovin hmasawnna hnathawk turin MNF chu a zikchhuahna tobul a dik bik. Zalenna an sual tak tak lo tia min sawiseltute hi zalenna sual laia tel ve peih lote an ni,” a ti.
“Party thenkhat chuan remna kan neih kum 1986 atang tawhin ‘Min han chhin teh u’ an ti thin. An va belchiang a, party dangah an lo peng leh hman zel a, vawi sawm chuang pema tui anga nghet lo an ni. MNF chu kum 62 chuang a la nghing ve ngai lo. Chuvangin heng mite hi under 10-ah bak an awm ngai lo. Enchhin chi an ni lo. Kalphung thar zuar ngun ber leh hralh thei lo ber an ni,” a ti.
Pu Zoramthanga chuan: “Kum nga kaltaa hmasawnna en ila tute nge ngawi renga hnathawk? Thenkhat chuan hmasawnna engmah an hmu lova, mipuite beidawngin an dah a, mipui beidawngte hip nan kalphung thar an zuar a. Kum 40 deuh thaw an au tawh a, mipuiin tute nge an nih an hrechiang a, an enchhin duh lo,” a ti.
“Burma, Bangladesh, Manipur leh Tripura atanga zohnahthlak lokalten min rawn hmuh hram an tum thin. A chhan chu, hnam thinlung pu sorkar hi an thlamuanpui vang a ni. Anni chuan kan Jerusalem – Mizoramah hian thlamuanpui awm lo sorkar a pian an hlau ber a ni.
“Pawn lama kan unaute chuan hnam thinlung pu, nationalism-a ding nghette chauh thlang tling turin min au,” tiin Zoramah zofate an champion theih nan leh thlamuang taka raltlante an loh luh theih nan mai bakah, hmasawnna tluantling a awm zel theih nan MNF support turin Dampa bial mipuite chu a sawm bawk a ni.
Khualzahawm Sports Minister Pu Robert Romawia Royte pawhin thusawiin, “Mi thenkhatin silpaulin bak phah theih lohna tura an ngaihah America siam ngat phullem kan phah thei hi state dangte awh tham a ni a, neih ve phakah pawh an ngaih loh a ni,” a ti.
“Tuna kan sak mek sports school ropui tak tak (Under PMJVK Rs nuai 3286.34)-te hi khawvel leh India huap infiammite training-na tur a la ni dawn a. West Phaileng pawh hi khawvel dang nen kan dawhzawm dawn a ni” a ti.
Pu Robert-a chuan National Education Policy 2020 angin khelmual chu school naupangten thlan tla khawpin chhawr se a ti a. “He khelmual hi school naupangten hmang tangkai se ka duh tak zet a ni,” a ti.
Tlawng thlang lamah thil tha an chhuak ngai lo an tih thin thu sawiin, “Dampa Savawm, Mamit Keite leh Hachhek Sakei-te thawkho turah Mizo mipui hian hmasawnna an hmuh duh chuan khawthlang lam an hawi dawn, hmasawn tumte chu khawthlang lamah an rawn kal zel dawn,” a ti a. Chief Ministerin khawthlang lam hawiin hmasawnna bul a tan dawn a ti.
Khualzahawm Govt Dy Chief Whip & Dampa MLA Pu Lalrintluanga Sailo pawhin thusawiin, sports infrastructure ropui tak tihhlawhtlin a ni chu lawmawm a ti a. “Dampa bial chu hmasawnnain a thlen phak lohna a ni thin. Tunah chuan lawm avangin bek thleng thlenga bawp khai a ni ta,” tiin covid hripui karah khaw hrang hranga infrastructure siam tharte a tarlang bawk.
Sawichhiatna leh beihna tam tak karah MNF Sorkar chu hmasawnna nen a kal zel tih sawiin Pu Rintluanga chuan, “Kan pu ber (Zoramthanga) hi kum 47 chhung ka zui tawh a, dam chhunga zui tlak a ni tih ka sawi ngam,” a ti a. “Beihna tinrenga an beih pawhin a chhang let ngai lo,” a ti bawk.
West Phailenga Chief Minister-in Service Centre leh Artificial Football Turf a hawnnaah hian MNF Gen.Hqrs. atangin Pu C. Manliana, GS leh hruaitu thahnem tak an tel a ni.
