Lalhmingthanga K-82, Khatla (Ex-Deputy Chief Minister) chu nizan dar 12:40 (AM) khan an chenna In Khatlaah awmlaiin a boral a, Lalhmingthanga hi PC Party, MNF leh BJP te chuan an sun thu vawiin khan thuchhuah an siam.
PC party chuan, “Vawiin November 3, 2020- a Lalhmingthanga (Kum 82) PC Party Consultant ni mèk leh Ex – Deputy Chief Minister in chatuan ram min pansan ta mai hi PC Party chuan kan uiin kan sun takzet.
“Pu Lalhmingthanga’n a that lai hun zawng PC Party leh kan ram tan a finna, thiamna leh theihna zawng zawng a hlan a. Kan ram dinchhuahna leh hmasawnna tura sul a lo sut tawhna zawng zawngte PC Party chuan kan ram siamthat nan kan vawng nung zel dawn a. A lei taksa chu awm tawhlo mahse Zofate thinlungah a nung thar zel dawn a ni.
“Pu Hminga’n a kalsan tak a nupui, a tu leh fa leh a chhungkhat lainate zawng zawng Pathianin thlamuanin awmpui zel se tih hi kan tawngtaina a ni.
MNF party chuan, “MNF General Headquarters Adviser ni mek Pu Lalhmingthanga K-82, Khatla (Ex-Deputy Chief Minister) chuan nizan dar 12:40 (AM) khan hun lo takin min lo boralsan ta a, vawiin November ni 3, 2022 (1:00pm)-ah a vuina hun hman a lo ngai ta mai hi MNF chuan pawi a tiin thinlung takin a sun takzet a. A kalsan tak a nupui fanau, tu leh fa, a chhungte zawng zawng Pathianin thlamuanin awmpui zel se kan duh tak meuh a ni.
“Pu Lalhmingthanga hi Mizoram rorelna sang ber MLA-ah vawi duai lo thlan tlin a ni tawh a, kum 1998 MNF leh PC party thawhhonaah Deputy Chief Minister nihna hial a lo chelh tawh bawk a ni. MNF chuan Pu Lalhmingthanga hi MNF party tana a thawhrimna te, Mizoram leh hnam tana theihtawp a lo chhuah tawhnate kha MNF chuan a chhuangin a theihnghilh ngai dawn lo a ni.
“Pu Lalhmingthanga vuina ah hian MNF Party aiawhin Sr.Vice President Pu Tawnluia, Deputy Chief Minister chuan thu a sawi a ni,” an ti.
BJP Party chuan, “Dt 3rd October 2022 (Thursday) zinglam 12:40 a Pu Lalhmingthanga Kum 82, Ex MLA, Khatla veng in Chatuan ram min pansan ta mai chu BJP Mizoram Pradesh chuan pawi kan tiin, kan ui hle a, Mizoram tan pawh hetiang ang mibik kan chan hi channa nasa tak a ni.
“Pu Lalhmingthanga Ex MLA in chatuan ram min pan sa ta hi a pawi kan ti hle a, Mizoram a Politician ten Minister nihna chanvo pawimawh kan neih te lo chelh tawhin, Mizoram tan rawng abawlna te chu hriat reng ani tawh dawn a ni. Mizo ten Politician kan neih zing a chhuanawm tak, ram tana atheihna nasa taka hlan tu kan chan ta hi apawi kan ti hle a ni. A kalsan tak achhung te thinlungtakin kan tawrhpui a, Lalpan thlamuanin awmpui zel rawh se tih chu BJP Mizoram Pradesh chuan kan tawngtaina a ni,” an ti bawk.
