September 24, 2022 (Inrinni) khàn Pu Vanlalruata, President kaihhruaiin PC Party Elected Office Bearers tharten a vawi khatna atan meeting, kan Party Office, Treasury Square, Aizawlah an nei.
He meeting-ah hian President Pu Vanlalruata chuan General Secretary 6: B.Vanlalhruaia, H.Lalremsiama, Lalenkima Khiangte, Lalnunthara, Lalramthara leh V.L.Thazova te a ruat a, Secretary 13 leh Joint Secretary 7 a ruat bawk.
He hunah vêk hian Pu Vanlalruata chuan vai sumdawng leh vai mistiri-ten sumdawnna leh hnaah Mizo min chimral ti tih tawh nia sawi fo chu ngaimawhawm a tih thu sawiin, “hemi laka inhumhimna tur leh heng harsatna chin felna tur hian dan tha awm sa reng kan sawrkar hian a hre lo nge a kengkawh ngam lo zawk tih hi ngaihtuah tham tak a ni,” a ti a.
Pu Ruata chuan, “Dan kenkawh loh avanga dinhmun tha lo taka kan awm hi PC Party chuan tha a ti lo tak zet a, nakum 2023 inthlanpui kan hmachhawn turah hian Zoram mipuiin sawrkarna min chelhtir a nih phawt chuan dan awm sa hmangin heng hi kan ching fel ang a. Dan awm sain a daih lo a nih pawhin dan thar kan siam mai dawn a. Sumdawnna leh hna zawng zawngah vaiho kan chimral let vek dawn a, PC Party Policy leh hma lakna turah hian kan hnam himna a awm a ni,” a ti bawk.
