Vawiin chhun dar 12:00 khàn Vanlalruata, Sr Vice President kaihhruaiin PC Party Office Bearers Meeting an Party Office, Treasury Square-ah an nei a. An President Lalhmangaiha Sailo chuan ṭhalai zawk tan a nihna a ken tak avangin PC Party OB Meeting chuan lungrual takin Acting President atan Vanlalruata Sr. Vice President an ruat.
Vanlalruata chuan, “PC Party President Pu Lalhmangaiha Sailo-in President nihna a chawlhsan chungchangah zawhna tam tak kan dawng a. Pu Lalhmangaiha’n a sawi tawh angin kum upa lam leh taksa chak lo chho zel a nih avang te, ṭhalai zawkte kuta Party hruai hna kentir a duh tawh avang te a ni ber a, hetiang rilru a pu hi ka ngai sangin ka zah tak zet a ni,” a ti.
Vanlalruata chuan, hmun tina PC Party mite chibai bukin, Kum 2023 MLA inthlanpui kan hmachhawn turah hian sawrkarna fawng chelhtu pawimawh takah PC Party mi leh sa te thlenpui ngei ka tum a ni tih sawiin, thahnemngai taka PC Party leh kan ram tana hma lo la zel turin hmun tina PC mite a chah bawk.
Vawiin PC Party OB Meeting hian September 22, 2022 (Ningani)-ah General Assembly neih hun atan an ruat a, hetah hian party hotu tur an thlang ang.
