PC Party khawmpui lianin hruaitu thlang

Peoples’ Conference (PC) Party General Hqrs. chuan vawiin khan Lalrinzuala Chawngthu, Vice President kaihhruaiin General Assembly PC Party Durbar Hall, Treasury Square-ah an hmang.
He hunah hian Vanlalruata President thar chuan, ”PC Founder President Brig.T. Sailo-a’n kan ram tana hmathlir thui tak neia eng emaw chen hma a lo lak tawh Pu Lal Thanhawla kaihhruai Congress Party leh Pu Zoramthanga kaihhruai MNF Party sawrkar thinten an chhunzawm mumal loh avanga kum 35 liam taa Six Basic Needs (kan ram mamawh bulpui parukte) vawiin thlenga kan ram din chhuah nan leh hmasawnna atana hnukpui ber la ni fan hi kei leh ka thawhpuite hian tihhlawhtlin ngei tumin theih tawp kan chhuah zel dawn a ni” a ti.
PC President thar chuan, Six Basic Needs chungchang sawiin, ”ZPM Party-in PC Party mi leh sate thlem nan Brig. T. Sailo Policy leh Programme kalpui tur leh tihlawhtling tura an insawi thin chu PC Party mi ni thinte leh Zoram mipuiite bumna hmanrua mai a ni tih sawiin, Pu Ruata chuan heti khawpa Six Basic Needs tuipui ber anga lang si tun tuma Economic Policy an tlang zarh takah an dah tel leh si lo a. Bairabi bula Tlawng lui khuah (Bairabi Hydel Project) phei chu an hlamchhiah thak a. Chuvangin, Mizorama political party-te zinga Bairabi Hydel Project tihlawhtling tur chuan keini PC Party bak hi kan awm lo. He Bairabi Hydel Power Project bik tana Clearance awm tawh sa, bul tan nghal theih kan state pual liau liau hi kan sawrkar phawt chuan kan bul tanna tur a ni a, Tuivai leh Chhimtuipui kan khuap bawk ang,” a ti bawk.
Vanlalruata chuan, ”PC Party Policy tihhlawhtlin a nih beiseia party hrang hrang lo bel tawh, beisei hmu leh si lo an tam thu sawiin, ”Hawh u, Brig.T.Sailo hoa kan ram siam tuma kan thahnemngaihna kha a hlawhtlin theih nan a paitu dik tak PC Party-ah lam hawiin ‘i kir leh ang u,'” tiin PC Party mite party danga awm tawhte leh Zoram mipuite a sawm a ni.
PC Party General Assembly hian R. Zatawna Returning Officer (RO) kaihhruaiin kum 2 chhung atan party hruaitu tur a hnuai a mi ang hian an thlang
President – Vanlalruata
Senior Vice President – Lalrinzuala Chawngthu
Vice President – Lalrinmawii Fanai
Treasurer – HK. Liansawta.