PC Party President Lalhmangaiha Sailo chuan nimin khan May ni 10, 2022- a Mizoram Legislative in kum 50 a tlin champhaphak a lawmna denchhenin, Assembly Annex a Exibition an buatsaih tlawhin thusawina hun a hmang.
Lalhmangaiha Sailo chuan, ”May ni 10 – a Mizoram Legislative Assembly in kum 50 a tlin champhaphak a lawm ṭum a Special Session te nei a, ram hruaitu ten thu sawi leh thuchah ṭha tak tak te nei a Golden Jubilee Programme an hmang kha ropui ka ti a. Mizoram Assembly House rorelna kalpui dan leh inkaihhruaina dan fel fai leh zahawm tak kan nei hi State dangte pawn entawn tlakah an nei hial te hi a lawmawmin a chhuanawm takzet a. Chu bakah he Legislative Assembly in kum 50 hmel a lo hmuh ve tak na huangah hian PC Party pawhin term 2 dawn lai rorelna fawng a chelh ve tawh a. Ram kaihruai tura hun remchang a lo nei ve thei kha a vote tling tu Zoram mipui chungah ka lawm a ni.
“Chu chang ni lovin kan Founder President Brig.T.Sailo, ka pa chungah pawh a hun tawp lamah mipuiin an duhsakna hlanin Assembly a ṭhu tur in an thlang tling leh a , a farewell thuchah kha vawiinah hian han tarlan leh ka duh a. Pakhatna chu- ‘Zoram mipui aiawh tura thlan tlin MLA te hi eng Party pawh ni ula, Mizoram hmasawnna hi átchilh berah lo nei thin ang che u,’ tihte . Pahnihna ah, ‘Kan ram hmasawnna daltu ber chu Hlemhlêtna ( Corruption) hi a ni a, chuvangin he House hi hlemhlêtna dona hmunpui berah lo nei thin ang che u,’ tihte leh ‘Rinawmna, Dikna, Taimakna leh Tlawmngaihna te vawn nun zelna kawngah he House- a Member ni tawh phawt te chu hmahruaituah lo ṭang thin ang che u’ tihte hi a ni,” a ti bawk.
