PC Party President Vanlalruata chuan vawiin khan Bairabi Hydel Project hmun tlawhin, “Pu Lal Thanhawla kaihhruai Congress sorkar leh Pu Zoramthanga kaihhruai MNF sorkarin he Bairabi Dam Project hi an bawhzui duh lo a. ZPM Party lah chuan bawhzui an tum loh an tichiang bawk a. Party dang ten kan ram leh mipui dinchhuah theihna an ngaihsak duh miah lo hian ka rilru a tina a ni,” tiin kan ram hmasawnna ruhrel pawimawh ni tur Bairabi Dam Project tihpuitlin anih theih nana thawhpui atan mipui a sawm a. Vanlalruata hi Sr. Vice President Lalrinzuala Chawngthu te, General Secretary Lalramthara leh VL Thazova te, Secretary B Lalrammuana leh Alfred Zoremsanga ten an tawiawm a ni.
Mizorama hydel project hmachhawp zingah a taka kutthlak leh bul tan tawh awm chhun chu Bairabi Dam Project hi a ni a. PC sorkar laiin he hna hi bul tanin tuikhuahna innghahchhan (foundation) turin luikam sir tawn tawnah lian leh thuk tak takin hmun 6-ah lei verh a ni a. Leiverh te hi Pu Lal Thanhawla’n ‘sakuh kaw tiat’ tia a sawi laiin a takah chuan feet 8 hawlhtlang vela lian vek an ni a. Luichhuat pawh thuk tak verh a enfiah vekin helai hmunah hian tui hi khuah ngam ngei a ni tih finfiah a ni a. Amaherawhchu, kum 30 deuhthaw chhunga bawhzui anih miah loh avangin kan ram hmasawnna ruhrel pawimawh tur chu tunah chuan hmun hlui satliah a ni a. “Bawhzui duh lotu te hian mipui dem rawn hial an hlawh a. ZPM Party in bawhzui an tum lo zui hi a pawi a. Hei hian party dangin kan ram an ngaihsak loh zia a tichiang a ni,” tiin, “Kan ram tana pawimawh, thang leh thar zel tana pawimawh zual zel tur Bairabi Dam Project a puitlin theihna awmchhun chu PC Party kan sorkar a ni a. Kan ram tana thawhpui atan mipui ka sawm a ni,” a ti.
He project hi ngaihsak anih loh avangin ramhnuai pik tak a ni a. Vawiina a hmuna kal hian leiverh te hi hmuh theih a ni lo a. Kum 2014 November ni 27 khan Vanlalruata ho tho hian MNF, MPC, PRISM leh ZNP hruaitu rual mi 26 in Sairang atanga Tlawng lui dunga lawnga kalin an tlawh a. Hemi \um hian a hmunhma hi vâtin leiverh te hi an sâm chhuak vek a ni.
