P&E Minieter leh Central YMA hruaitute’n TBCC an tlawh

Tawngtai Bethel Camping Centre, Sakawrtuichhun-in electric a harsatna an tawh chungchangah Central YMA te ngenna angin Thawhlehni khan Power & Electricity Minister R. Lalzirliana chuan Central YMA hruaitute nen Sakawrtuichhun-a Tawngtai Bethel Camping Centre an tlawh a. He Centre in electric a harsatna an tawhte sutkianpui dan tur chungchangte a hmunah an sawi ho a ni.
Electric bill pek theih loh vanga Tawngtai Bethel Camping Centre(TBCC)electric connection tihtawp sak a nih chungchangah Minister chuan TBCC harsatna sutkian dan tur ngaihtuahin, CYMA te nen an thut khawm nghal thu leh hemi chungchang hi an lo sawiho tawh tih a sawi a. TBCC electric bill ba rulhna tura R. Lalzirliana, Minister leh Dr. K. Beichhua, Minister of State ten an thawh khawm Rs 5,00,000/- chu a hmunah hlanin, electric lo disconnect tawh pawh re-connect leh nghal turin a ti a.
Hei bakah hian electric bill pek theih loh a awm tawh lohna turin TBCC connection leh load hrang hrang awm dan te chu P&E deptt. a thawktuten en chiangin ruahmanna siam a nih tur thu a sawi a. Department hnathawktute chu TBCC enkawltuten lo thawhpui thiam turin a chah a ni.
Minister chuan TBCC in harsatna an neih te chu a sut kian pui theitu tur dik tak, department enkawltute hnenah thlen hmasa thin tura a duh thu a sawi.