Vawiin khan Provisional Employees Association of Mizoram chuan thuchhuah siamin, “Provisional Employees-te Austerity Measure hmanga Sawrkarin kan Regularization Scheme kum hnih dawn min dansak chungchangah; hnahnuaihnung zawk thawk te mangangin min phelhsak thuai turin Ministry leh Official lam vawi eng emaw zat kan dawr tawh a. Mass casual leave hial kan la a nih kha.
“Kan Chief Minister zahawm takin a office-ah inhmuhna hun min siamin Principal Secretary, Finance Department changtute nen sawiho a ni a, thu tihtluk nghal rum rum theih a nih loh avangin kan Chief Minister hian Finance Department lam nen sawihona lo nei turin min thlah a, chutianga inthlah siin thlakhat a vei hnuah pawh sawiho tura inkoh chu sawi loh Principal Secretary, Finance Department hian appointment kan dil vawi nga lai chu min hnawl fithlak sak a, tichuan sawiho pawh awm lovin Finance Department lam chuan ni 28.03.2022 hian Provisional Employee-te lakah Notification (No.G.17014/4/2019-FEA/161) thar an rawn chhuah leh lawi si a. Chief Minister zahawm takin sawiho tura min tih laia sawiho pawh awm lova hetia thu an rawn chhuah leh mai si hi Provisional Employee’s Association of Mizoram (PEAM) chuan hriatthiam har a ti tak zet a, a tul anga hma la zui turin Executive Committee chuan thu a ti tlu a ni.
“Kan chanvo min hrensakna hi lakkian a nih ngei theihna tur leh kum upate in tuamhlawm vena tur NPS kan hmuh ngei theih nan Provisional Employee’s Association of Mizoram (PEAM) chuan theih tawp chhuahin hma a la dawn a, Mizoram puma kan member, Provisional Employee zawng zawng ten Provisional Employee’s Association of Mizoram (PEAM) General Headquarter thuchhuak ngai chang a, lo zawm theuh turin kan inngenin kan inhriattir a ni,” tiin a tarlang.
