MZP Gen. Hqrs. chuan Cooperation Department hnuaia pension rawih nawn tha a tih loh chungchanga Mizoram State Cooperative Service Association (MSCSA) hruaituten MZP hruaitute hnenah pension rawih nawn chungchang ngaihtuah nawn leh tura an ngenna angin vawiin khan OB & Advisers Meeting an nei.
MZP chuan tunhnaia Mizoram sorkarin Cooperation Department hnuaia hnathawk Addl. Registrar Cooperative Societies pension tawh rawih nawn leh a tum chungchangah mimal induhsakna leh mi bik nihna awm lo a nih avangin pension rawih nawn chungchanga Executive Meeting hmasain a lo rel tawh angin dodal tlang ni se, tiin a rel a.
Pension tawh rawih nawn tumna order hi cancel turin Mizoram sorkar an ngen nghal a, a hnuk kir lo a nih chuan, hmalakna hmasa atan August ni 1, 2022 (Thawhtanni) chhun dar 12:00-ah pension rawih nawnna order hi hal ni se an ti a. An hmalakna hian awmzia a nei lo a nih chuan a tul angin rel zui leh a ni ang, an ti.
MZP chuan Ni 25 May, 2022 khan Chief Minister hnenah pension tawh ruai nawn lo tura ngenna ziakin a lo thlen tawh a. Hemi rual hian Cooperation Department changtu minister hnenah thlen nghal a ni a. July ni 25, 2022 khan Cooperation Department changtu Minister hi MZP hruaituten a office-ah lengin pension tawh ruai nawn lo hram turin a ngen nawn leh a ni.
