Vawiin khan MPCC Treasurer leh Thorang bialtu MLA ni bawk Zodintluanga chuan a bial chhung Phairuangkai khaw Golden Jubilee lawmna a hmanpui.
Golden Jubilee lawmna hi Phairuangkai Playground-ah neih a ni a. Lawmna inkhawm neih hma hian, Phairuang lei bula Jubilee lung phun chu Bialtu MLA Zodintlaung chuan hawng hmasa a. Hemi hnua Golden Jubilee lawmna Phairuangkai Playground neihah thusawiin, Zodintluanga chuan, “Kumina ka bial chhung kaw hnih Rotlang West leh Phairuangkai khua ten Golden Jubilee an lawm thei hi a ropui takzet a. Pathian malsawmna leh khaw inlungrualna avang chauha Golden Jubilee hi lawm thei kan ni tih kan hriat a pawimawh a ni,” a ti.
Phairuangkai khua a din tirh atanga mei mit lova an luah lum thei leh an khaw sah chhuahin kum 50-na Golden Jubilee hial an lawm thei chu ropui a tih thu a sawi a. Zodintluanga chuan, Phairuangkai khaw din tirh te atangin a nu leh pa ten Phairuangkaiah hian huan an neih avanga vawi tam tak kal a, mahni khua ang maia an lo khawsakna thin a nih thu a sawi. An chhungkua pawhin Phairuangkaiin Golden Jubilee an lawm thei chu an lawmpui takzet a ni, an tih thu a sawi bawk.
Jubilee lawmnaah hian Phairuangkhai VCP Pu Lalthanmawia pawhin thu a sawi a, VCP chuan Phairuangkai khua-in kum 1972 khan thlawhbawk permit an neih thu leh khaw hmun nghet ni turin Phairuangkai khua hi an din tan thu a sawi a. Kum 1984-ah Village Council nei tanin, he khaw hmasawnna tur atan hian bialtu MLA Zodintluanga’n theih tawp a chhuah sak thu a sawi. Ani bakah hian an bialtu MLA lo ni tawh zawng zawngte leh BDO lo ni tawh zawng zawngte chungah thinlung taka a lawm thu a sawi bawk.
Phairuangkai khua hi Lunglei atanga km 40-a hlaa awm a ni a. In 341 ni mekin mihring 1,490 an awm a, VC member 5 awmin, Kohhran hrang hrang 10 an awm mek a ni.
Phairuangkai hian an khaw Golden Jubilee lawmna programme an hman zawh hian khawtlangin Jubilee ruai an theh bawk a ni.
