ASEP Gen. Hqrs. Aizawl chuan mi rinawm takte hnen aṭanga thu a dawn angin Phulpui, Maubuang, Sumsuih leh Ṭhiak ramte kartawna awm mek Ramsial humhalh tlat a nih theih nan heng khaw 4 te hi October ni 21, 2024 hian tlawhin a hmunah thil awm dan an enfiah. Ramsial chu a awm ngei niin a lang a, a rual ni lovin pakhat maltlat niin hriat a ni.
Mizorama ramsa hmuh tur vang tawh tak Ramsial a lo la awm chu ASEP chuan lawmawm a ti a, tu kut palh mah a tawrh loh nan humhalh tlat turin heng khaw 4 a VC leh YMA ah ngenna lehkha pek vek a ni a. Heng khuate pawh hian theihtawpa humhalh an tum thu an sawi ve bawk.
Ramsial hi Nungcha Humhalhna Dan The Wildlife (Protection) Act, 1972 ah Schedule I animal zinga awm a ni a. Dan bawhchhetu chu kum 3 aia tlem lo lung in tan leh cheng nuai 1 aia tlem lo chawi tira hrem theih a ni.
