Climate activist Sonam Wangchuk leh a thu rualpui mi 120 lai, Sixth Schedule status (tribal mite hungbikna) ngiata Ladakh atanga Delhi thleng kawng zawh tumte chu Delhi daiah police ten an hreng bet a. Anni thlavang hauhin Rahul Gandhi chuan Modi hnenah chhuah turin a ngen.
Sonam Wangchuk leh mi dang te hian Singhu border (Delhi khaw daifem, loneituten protest an lo neih tawhna hmun)-ah zan riah an tum a, thu neitu lamin haw darh tura thupek an chhuah hnua an inthiar fihlim duh loh avangin police ten an hreng bet ta a ni.
He thu hi Rahul Gandhi-an a hriat veleh thuchhuah siam nghalin anni hi lo neitute ang kha an nih thu leh an thute ngaithla turin a ngen sak a. Rahul hian kum upa lam thlenga an hreng bet chu thil awm lo tak a nih thu sawiin Sonam Wangchuk leh mi dang za rual teh meuh an hren beh te hi danin a phal ang taka kawng zawhtute an ni a, hrenbeh hi thil tih loh tawp tur a ni. Ladakh hma lam thlirin kum lama upa tawh thlenga rawn kalte hi engtin nge an hrenbeh theih tiin a sawi chhuak a ni.
Report atanga a lan danin Sonam Wangchuk leh mi dangte hi Alipur police station leh city daifem hmun dang, Delhi-Haryana border-ah te dah an ni a, police officer pakhat chuan hun remchangah chhuah zalen an ni ang tiin a sawi a ni.
Eng vanga hrenbeh nge an nih?
He kawng zawha tel hmeichhiate chu hrenbeh an ni lo va, mi panga emaw a aia tam emaw pun khawm phal lohna thupek hmanga hrenbeh an ni. Sonam Wangchuk-a instagram atanga a lan danin Delhi border an thlen laiin police tam takin bus hmangin an lo dang tih a hriat theih a, Wongchuk leh police inbiakna pawh he video atang hian a hmuh theih a ni. Wangchuk chuan vengtu nei loa kal kan ni a, Delhi kan luh dawnah min man ta a ni tiin a sawi. Delhi daifemah hian police 1000 bawr vel an lo awm a, Delhi khawpuia Ladakh Bhawan ah security force an awm khat tlat a, Ladakh atanga zirlai awmte chenna hmunah pawh police duty tir an nih thu a sawi bawk. Thawhtanni atana ni ruk chhung chu Delhi police ten Delhi chhung leh daiah mi panga emaw, a aia tam banner leh placecard keng emaw protest emaw an awm a nih chuan dan bawh chhia an nih thu an chhuah a ni.
KAWNG ZAWH CHHAN
He kawng zawh hi Leh Apex Body (LAB) leh Kargil Democratic Allaince (KDA) huaihawt a ni a, anni hian State a awm thlawpin Constitutional’s Sixth schedule (tribal humhimna) an ngiat a, Public Service Commission for Ladakh neih au chhuahpuiin Leh leh Kargil district tan Lok Sabha seat thendarh an beisei a ni.
