Hachhek Bial Kuhva Chingtu Pawl (HBKCP) chuan July ni 12( Nilaini) Zing dar 9:00 aṭangin chhun/zan zawmin Zamuang Police Check Post-a duty te tha ti chak turin an duty ve tawh dawn tih thu an tlangzarh.
HBKCP Executive Committee, Nimin (10/7/23-Mon)-a Kawrthah North VC House a neih chuan, Dan phal loh Kuhva tawlhruk avanga Kum 2022 chhunga Hachhek Bial Kuhva chingtu mipui sum hmuh tur an hmuh phak (hloh) zatte zir chiangin, kum 2021 ah Cheng Nuai 3235 chuang an hmuh lai leh, kum 2022 ah Cheng Nuai 5000 chuang hmuhchhuah an inbeisei lai a, Cheng Nuai 2000 chuang an hloh chu na an tiin, Dan palloh Kuhva ro phurtuten harsatna an siamsak hi tawrh thiam harsa an ti a ni. Hetiang thil avang hian kumin a an Kuhva tharchhuah hralh kawnga harsatna an neih lohna turin Dan lova Kuhva tawlhte an dan chah theihnan HBKCP Executive Committee chuan Zamuang Police Check Post behchhanin July ni 12(Nilaini) zing dar 9:00 atangin chhumlo chat lova duty turin ruahmanna an siam ta a ni. Hachhek Bial khaw hrang hrang aṭangin darkar 24 zel a inchhawkin an duty dawn a ni.
An duty chhungin khawii aṭang mahin Dan phalloh Kuhva, Hachhek Bial chhunga tawlh lut lo turin, Kuhva tawlha inhnamhnawih zawng zawng, Lirthei neitu leh khalhtu zawng zawng te an ngen nghal a ni.
Zamuang a Police Check Post hi HBKCP thuneitute a ngen avanga siam a niin Hachhek Bial chhung Police Station leh Outpost bakah I.R leh MAP lam te duty tura fawm khawm ṭhin an ni a. HBKCP chuan Hachhek Bial chhunga Police leh Armed Force awmte khawii station mah hian an sanctioned strength an phak loh avang hian Sorkar lamah pawh ngenna an siam tawh a ni.
Hetianga duty beihpui a thlak leh dawn tak avang hian HBKCP chuan mimal leh Pawl anga sum leh pai thawhtute zawng zawng chungah lawmthu a sawi bawk a ni.
