Kolasib leh Serlui bial tlawhin MPCC Vice President leh hruaitu dangte chuan nimin July ni 31, 2023 khan Vairengte khawlaiah Street Campaign neiin vawiin August ni 1, 2023 hian Kolasib Synod Conference Hall ah Congress Worker Meet an hmanpui. He hunah hian MPCC Vice President Pu Lal Thanzara leh Pu Lalnunmawia Chuaungo, IAS Rtd. te bakah Pu Anggu Lalhmachhuana, Secretary, MPCC ten thu an sawi bawk a ni.
MPCC Vice President Pu Lal Thanzara chuan, kan ram kaihruaitu tur thlan chungchangah mipuite chu fimkhur tura chahin mi thenkhatten politics ka ngaihsak peih lo, ka tel vena chi a ni lo ti thin mahse, politics tha lo avanga tawrhna hi kan zavaia chungah a thleng thei a. Politics kal sual avangin kan ram chu kum 20 chhung a buai a, thlarau mite pawh Biak Inah an inkhawm thei bik lo. Kan politics dik loh avangin kan ram economy a tla chhe mek a, a tuartute chu mipui tho kan ni. Chuvangin mipuite hian politics ngaihven a, tute hi ram hruaitu tha tih hi kan zirchian angai tih a sawi.
Pu Lal Thanzara chuan, Central lamah All India Congress Committee te thlazar hnuaiah regional party hrang hrang inzawm khawmte chuan BJP sorkarna ti tawp turin tan an la chho mek a. BJP do duh ho zawng Congress Party-in a kuah khawm mek a ni. Congress Party chu nakum India ram inthlanpui lo awm turah kan Sorkar ngei dawn a. Hnam hnuaihnung leh sakhaw tlem zawkte tan Congress Party hi himna kulhpui a lo ni tawh thin. Mitin leh Sakhaw hrang hrangte inti buai lova zalen taka kan awm theihna turin Congress Party chu a sorkar leh ngei dawn a ni. Mizoramah pawh kuthnathawktute leh miharsa zawkte tan Congress hi kan sorkar leh angai a. Tang Puihna hmanga miretheite khai chhuak tur leh a chhe lai siamthatu ni turin chung lamin Congress Party hi min buatsaih mek a ni, a ti bawk.
Mizoram Chief Secretary kal chhuak ta, Pu Lalnunmawia Chuaungo pawhin thusawiin Congress Party chuan Kan Ram, Kan Hnam, Kan Sakhua hi kan dah pawimawh bera, development hi engang pawhin thawk nasa mah ila, kan ram, kan hnam, kan sakhua a him si loh chuan chung thilte chu engtihna mah a nih dawn loh thu sawiin tunah hian BJP Sorkar hnuaiah Kristian Sakhaw lungphum a nghing mek a. Hei hian Kohhran hruaitute mut a ti tui tawh lo a ni, a ti. Pu Lalnunmawia Chuaungo chuan, Jammu & Kashmir chungchang sawiin India Constitution Article 370-na hi Kashmir chuan hun rei tak inhumhimna atana an hmang tawh chungin Constitution duangtute zahpahna nei miah lovin BJP Sorkar chuan kum 2020 khan thiah sakin State atangin Union Territory ah an dah. BJP te hi India rama kan sorkar nawn tir a nih chuan Uniform Civil Code hi min hman luih pui dawn tih hi a chiang a ni, a ti.
Kan ram, kan hnam, kan sakhua a him theihna turin BJP chu do turin Pu Lalnunmawia Chuaungo chuan, Mizo mipui leh Kristiante a chah a, Central lama BJP lam tang lo tur kan thlan a ngaih thu sawiin Pu Nunmawia chuan, MADC inthlan dawn March ni 24, 2022 khan ZPM Leader chuan, ‘ZPM lo sorkar ta sela, Delhi ah BJP lo sorkar ta bawk selangin, helaia BJP te tel lo hian kan kal kan daih anga, thianah kan insiam tho dawn’ tia a sawi mai kha Mizo Kristiante tan a pawi em em a ni. Central-ah hian kawng pahnih chiah thlan tur a awm. Pakhat chu BJP leh thawhpui te an ni a, pakhat leh chu Congress leh a thawhpui te an ni. Mizo Kristiante hian a tu zawk nge kan thawhpui dawn. A tu zawk nge thawhpui ila kan ram leh kan hnam, kan sakhua min humhim sak thei zawk dawn tih hi ngun taka ngaihtuah turin Zoram mipuite a chah a ni.
