ZPM Leader Lalduhoma leh ZPM General Headquarters hruaitu thenkhatte chuan Champhai leh a chhehvel khuate an fang zel a. Nimin leh nizan khan Vapar, Diltlang, Hnahlan, Tualcheng leh Selam khuaahte vantlang inkhawm neiin hun an hmang a; Pu Lalduhoma’n Diltlang atangin mi 31, Hnahlan atangin mi 484 leh Tualcheng atangin mi 144 a lawmlut a ni.
Lalduhoma chuan thusawiin, “Mizoram hi mi pahnih hnuaiah hun rei tak chhung enkawl kan ni a, pakhat kan ning a, a dang pakhatin kan thlak leh a, chu chu kan ning leh a, kan nin hnu bawk kha kan thlang leh thin a ni. Tunah chuan ZPM tan kawl a eng tan niin kan hria a, Pathian leh mipuite zarah sawrkar ngei pawh kan inbeisei a, sawrkar tur pawhin kan inpeih tawh a ni,” a ti. “Congress unaute hun hi a liam mek niin kan hria, hun rei tak chhhung min lo enkawl a, min hruaitu atana Pathian min pekah kan pawm thlap a ni. Tunah chuan party ral lam atang hian ram tana tangkai hi a harsa a, amaherawhchu ram tana theihtawp lo chhuah thin leh experience nei tha an nih avangin kan pawlah hian lo tel se la, min hruai se la, an hna lo thawhte thawhte pawh chhunzawmho turin kan sawm a ni. Chutiang bawkin MNF te pawh, ram hmangaihtu, ram tana nun hlantu an ni; amaherawhchu an hruaitu hian nitinin a hniam zawngin a hruai si. Tunah chuan mipui hian MNF ni lo, Congress ni lo kan mamawh ta a ni,” a ti.
ZPM Leader chuan, “Keini ZPM chuan kan tih theih ngei tura kan hriatte policy kan siam a, kan tlangzarh tawh a ni. Kan sawrkar veleha kan khuah tur lui te pawh kan thlang tawh a, power-a kan intodelh theihna turin hma kan la nghal dawn a ni. Tun hmaa kan basic needs leh tuna kan basic needs hi a in ang vek tawh lova, tunlai hmasawn ang zelin kan basic needs pawh a pung zel a ni,” a ti a. “Kan sawrkar hrawn tawh ten thingtlang lo neih bansan turin min hrilh thin a, mahse kan ram budget-ah thingtlang loneitute chanpual tur a awm ve lo a ni. Chutih laiin kan buh thar chhuah ang angte erawh Mizoram thar chhuahah chhiar an chak leh hle si a. Thingtlang lo neih bansan turin thil chi hrang hrang min chintir a, mahse a market an ngaihsak leh si lova, retheihna khurah min hnuklut ta a ni. Min hrek rethei ta maw tihah sem policy hmangin min bum leh ta a. Heng mite hian kan hausak hi an phal lova, min hrek rethei te tea sumin min lei leh mai thin a ni. Retheihna khura min hnuk luttute hian kum 5 danah nachhawkna tlemte hmangin min bum leh thin a ni,” a ti.
Lalduhoma chuan, “Keini ZPM chuan policy mumal tak neiin mithiamte nen ngun takin kan zir a, bana kaih (hand holding policy) hmangin kan inkhaichhuak dawn a ni. Chhungtin hian thiam zawng, tui zawng leh theih zawng kan nei vek a, mahse bultanna kan neih loh avangin kan ti thei lova, chungte chu bana kaih policy angin bul kan tan sak dawn a ni. Sem policy a ni ve lo, a sik leh sa a zirin, ram awih tlan dan azirin mithiamte nen mumal takin hma kan la dawn a ni. Mipuite thiltih leh hmalaknate chu hlawhtlinpui theih a nih leh nih loh te, an chhungkua chu puih tlak an nih leh nih loh te, an mamawh leh trade thlan azirin uluk takin kan thlang dawn a ni,” a ti a. “Kan thalaite pawh skill development leh entrepreneurship bikah hian an project a zirin puih tlak an nih chuan a hranpain budget kan dah ang a, kan pui dawn a ni. Tunah hian kan ram tihdam duhtu leh duhlotu pawl pahnih kan awm a, keini ZPM chuan kan mawl ang angin kan theihna ni miah lovin chung lam malsawmna kan dawng nasa em em a, lehlamah chuan kan sawrkar hlau em em an awm a, heng mite hian kan ram hi a ding chhuak ang tih an hlau em em a, anmahni zawk hi an ding chhuak leh tawh lovang tih an hlau em em a ni,” a ti bawk.
