Vawiin December 5,2022 (Thawhṭanni) chhun dar 11:00 am hian Vanlalruata, PC Party President chuan PC Party Office, Treasury Square ah Mizoram a electricity power siamchhuah nan Hydel Project a ṭhat ber thu a sawi.
Vanlalruata chuan Mizoram a electricity power mamawhna san zia leh kan mamawh phuhru khawp siamchhuah ngei a ngaih zia sawiin, “Mizoramah Solar leh Hydro Power siamchhuah ve ve tawh a ni a. Project tih puitlin te dinhmun uluk taka zirchianin Solar aiin Hydro Power siam hi Mizoram tan a remchang zawkin a ṭha zawk a ni,” a ti a.
Tunhnai a hemi chungchang zirchiang tur a Hydel Project leh Solar Project party mi ten an tlawh dan te sawiin, heng project awm sa aṭanga khaikhin a Solar aia Hydro Electricity Project ṭhat zawk zia Power Point Presentation hmangin a sawi fiah a ni.
Vanlalruata sawi dan chuan, Hydel Project hmun hung a ngaih loh laiin Solar Project chu hung a ngai a :Hydel Project chhungah kawng siam a ngaih loh laiin Solar Project lian siam dawn chuan a chhungah kawng siam a ngai dawn a: Hydel Project ah a project chhung a thlunzawmna tur wire hi solar ah chuan a ngaih laiin hydel ah chuan a ngaih loh avangin Hydel Project aiin Solar Project a hautak zawk a. Hetih lai hian Hydel Project kalpui a hlawkna dang awm thei inkalpawhna leh bungraw thiarna remchangte, tui lak tur te, sangha leh lui sa dang pung tur te leh mihring tana ṭangkai thei tur hrang hrangte solar ah chuan a awm ve lo a ni.
“Hetiang anih avang hian kawlphetha siamnan Mizoram atan Solar Project aiin Hydel Project a hlawk zawk a ni,” tiin Vanlalruata chuan a sawi bawk a ni.
